Williamnagar, Oct 5,2024: A·dokni Animal Husbandry aro Veterinary, Fisheries, Printing aro Stationery Minister, AL Hek, PHE, Soil aro Water Conservation, Housing-ni Minister Marcuise N Marak baksa, East Garo Hills Deputy Commissioner, Vibhor Aggarwal, Superintendent of Police, S.A Rynjah, Animal Husbandry aro Veterinary-ni Director, Dr. CD Sangma aro gipin official-rangni dongpaanio Sukrobar salo Samanda Veterinary Dispensary-ni gital building-ko Samanda-o oprake on·angaha.
Samanda Veterinary Dispensary-ko oprake on·ani somoio Hek jinmana aganprakangengon, ia dispensary-ko kulianichi a·jani manderangna namen dakchakani ong·chongmotgen aro veterinary department-ni official-rangan, a·jatango jile kae cha·giparangna nanganirangko on·anio daito gnanggipa ong·a ine Hek aganaha. A·jani manderangna dispensary-ni namgnirangko mesokatengon, a·jani manderangni namgnina kamtangtangko namedake ka·china veterinary official-rangko Minister didiangaha.
Uandake, dispensary-o man·gipa cholrangko ra·china gita PHE Minister Marcuise N Marak-ba, songni-nokni manderang aro jile kae cha·giparangko didiangaha aro uamangni jilanirangna nanggipa sanna bananio veterinary official-rang baksa agangrikchina gitaba ua didiangjolaha. Indake, anti-bajaro palna gita matchu-matte dokchakram biapko ru·utgijan Williamnagar-o rikgen ine PHE Minister manderangna ku·rachakangaha.
Apsandake East Garo Hills a·jani Deputy Commissioner, Vibhor Aggarwal-ba, veterinary dispensary-o man·gipa namgnirangko manderangna agan-talate, ua namgnirangko ra·china manderangko didiangaha.
Uandake, re·anggipa 2021-2022 bilsina RIDF-ni chamatgipa NABARD-ni chamatgipa gong kror 1.72 tangkarangchi ia dispensary-ko rikaha ine Animal Husbandry aro Veterinary-ni Director, Dr. C.D Sangma manderangna parakataha.
