Tura, Nov 30, 2024: A·chik Holistic Awakening Movement (AHAM) Tikrikilla Unit, re·anggipa November 12 tariko PWD (Roads)-ni Executive Engineer, Tura North Division-na, Sub Divisional Officer PWD (Roads) Dadenggre Division-ni jak gita chitti seataha.
AHAM Tikrikilla Unit-ni seatgipa chittio janapatani gita Tikrikilla-oni Rangsagre songona re·gipa PMGSY ramako Rangsagre songona Roni chiringko ka·batgipa bolni dollong namjahani gimin salanti re·a doanio neng·nikani aro kenchakanirang ong·engani gimin, ta·rake taridape on·china aro RCC dollongna proposal tarie on·china mol·molataha.
Indake, AHAM Tikrikilla Unit-ni seatani adita salni ja·manon Roni chiringko kabatgipa bolni dollong nosto ong·e, manderangni salanti re·a doanio neng·nikani aro kenchakaniko ma·sichake, PWD (Roads) Department taridape on·aha ine parakataha.
Uandake manderangni neng·nikani aro kenchakaniko ma·sichake ta·raken kam ka·atahani gimin, West Garo Hills-ni PWD (Roads) Tura North Division-ni EE-ko AHAM Tikrikilla Unit-ni General Secretary Lenush Marak mittelpilani kattarangko parakatskaha.
Unbaksana mikkangchi Roni chiring bolni dollongko RCC dollongna proposal-ko PWD (Roads) Department chu·sokate on·china gitaba Marak mol·moldapataha.
