Tura, Sept 23, 2024: All Garo Hills Trained Electrician Association (AGHTEA) HQ Tura, re·anggipa September 21 tariko, South West Garo Hills a·jao gital AGHTEA Ampati Unit-ko songaha ine u·iataha.
Ua tom·aniko Betasing Farmers Market-o ong·ate, headquarter-ni dilgiparang, AGHTEA Ampati Unit-ni gital dilgiparangko seokangjolaha. Seoka man·gipa AGHTEA Ampati Unit-ni dilgiparangara President Chembirth B. Marak, Bukul Hajong Vice President, Saylendro Ch. Marak Secretary, Lebithson Ch. Marak Joint Secretary,
Lipton A.Sangma Accountant, Rattan Paul Treasurer, Saillish Kumar Paul Adviser aro gipin sak 10 executive member-rangko seokangaha.
Uandake, tom·anio adita Resolution-rangkoba ra·gatangaha, skanggipa
Licence donggijagipa a·palchini Contractor-rangko rimbae niam gri wiring ka·ataniko champengna,
Garo Hills-ona gital electrification line post-rang sokbagipa project-rangko company-oniko ra·skae MePDCL Department-rang Association-ni train ka·gimin ba skie ra·gimin manderangko jakkalgija a·paloni manderangko jakkalaniko champengsona,
kam ka·enggipa electrician sakantian Association-ni ID Card-rangko ra·bitna aro chola ba uniform-ko ganna nangchongmotgen,
MePDCL Department-ni lineman-rang nokni wiring-rangko ra·e ka·na man·jawa, saoba Association-ni niamrangko manigija kam ka·ode raka ja·kuko de·anggen, ine AGHTEA HQ-ni President Justine T. Sangma mikkrakatangaha.
Garo Hills-o wiring ka·atenggipa manderangko Association, indake mol·molatenga, jemangan an·tangtangni noko bijoli wiring-ko ka·atengachim, Association-ni ID Card-ko sandisopachina Justine Sangma mol·molataha.
