Tura, Sept 28, 2025: Federation of All Skul Teachers of Meghalaya (FASTOM), Adhoc Skulrango Skigiparangko Deficit System-ona ra·dochina ba Deficit-ni dormaharangko on·pachina, 2019 bilsionin dabie, chotchangija Memorandum-ko a·dok sorkarina aro Education Minister-na on·genchimoba, a·dok sorkari uamangni dabianiko knachakjaha ine FASTOM-ni dilgiparang parakataha.

FASTOM-ni mongsonggipa dabianiara Adhoc Skulrango Skigiparang komibegipa dormaharangkosa man·engani gimin, uamangni dormahako bariatchina, Deficit-ni gadangona ra·dochina ba Deficit Pattern ba Deficit-ni gadango man·enggipa dormaharangko on·pachina dabiani ong·achim. Deficit skulrango skigipani kamo rakkina gita apasan poraiani gadangrangkon nangachim.

Skigiparangni parakatani gitade, adhoc skulrango skigiparangna bate, IV Grade-ni gadango kam ka·giparangan dormaha batachim. Adhoc skulo skigiparangni man·enggipa dormaharang LP Skulo hajal 18,000, UP Skulo hajal 20,000, Secondary skulo hajal 29,000, Higher Secondary Skulo hajal 33,000 aro Science skigiparang hajal 31,000-kosan man·engachim.

“Salantio jakkalna nangipa bosturangni damrang bariahani gimin, koros amchakja aro chinga dedrangrangko namnamgipa skulrango poraiate Doctor, Engineer aro Pilot ong·atna sikoba, da·alo chingni man·gni dormaharang chu·ongjani a·sel dedrangrangko nama gadango poraiatpana man·ja” ine skigiparang parakataha.

Batanggipa 2024 bilsini November 18 tarik aro 2025 bilsini June 8 tariko a·dokni Skotong Minister aro Education Minister-ko gronge Memorandum-ko on·taienba, skigiparangni neng·nikanirangko tale aganahachim, indiba a·dok sorkariko chalaienggipa Skotong Minister maming ka·dongani kattarangko da·alonaba aganchaka dongkuja, ine skigiparang suk ong·gijaniko parakataha.

Skigipa saksani parakatani gitade, South Garo Hills-o gitchambatsranggipa Adhoc UP Skul jekon 1953 bilsio Mibonpara-o kuliahachim, ua da·alo bilsi 72 gapaha aro West Garo Hills-o Shyamnagar Higher Secondary Skulko 1963 bilsio kuliaha ua skulrangko da·alonaba nambata gadangona ra·dokuja, ua skulrango skigiparang bilsi 72 mangna baten dangdike on·aha, indiba skigiparangni man·gnirangko da·onaba bariatkuja. Uni gimin pilak adhoc skulrango skigiparang neng·nikanirangko chagrongna nangenga.

“Chinga skigipani kamko ka·engon, skichakram kuturio chatro, chatrirangna skie on·na nanggenchimoba, chingni dabianiko knachakjani gimin da·alo sorokona ong·kate, sorkarini kosako jegalaniko dakna draatako man·aha, aro Robibar saloba dontonggija jingjengataniko dakna ga·akaha,” ine FASTOM Garo Hills Region-ni General Secretary, Elvis R. Marak kobor ra·timgiparangna aganaha.