Tura, Sept 14, 2025: Federation All Skul Teachers of Meghalaya (FASTOM)-ni Annual General Meeting ba dal·begipa tom·bimonganiko Sonibar salo, Tura Dobasipara Secondary Skulni kal·chakramo ong·atangaha.

Ia tom·bimonganiona Meghalaya a·dokni dingtang dingtang Skulrango skienggipa Adhoc Teacher-rang re·bae bak ra·angtokaha aro uamangni mongsonggipa dabianirangara, adhoc teacher-rangko deficit system-ona ra·doe on·china aro adhoc skigiparangko deficit system-ona ra·doe on·na man·jaode, pattern deficit-ni scale pay-ko on·skachina FASTOM a·dok sorkario dabiangaha.

FASTOM CEC-ni Vice President-rang Sanborn Jungai, Kinstar Momin aro General Secretary Sainbor Jhon Lyngdoh mangni jinmana talatangani gitade, batanggipa 2019 bilsionin adhoc skigiparangni nangnikanirangko chu·sokate on·pachina dabie, changni chang memorandum-rangko a·dokni Skotong Minister aro Education Minister-na on·hachim. Indiba da·alona kingkingba a·dok sorkari chu·sokate on·kujaenga.

FASTOM dilgiparangni aganani gitade, a·dok sorkari uamangko adhoc skigiparang ine onchepe ra·enga, matnangatenba, adhoc skigiparang aro sorkari skulrango skigiparang maming dingtanggrikani dongja, apsan kamkon ka·enga. Indiba adhoc skigiparangna dormahako onchepe on·enga aro sorkarini uamangna on·enggipa dormaharang chu·ongja, ine parakataha.

Uni gimin Adhoc skigiparangnaba, sorkari Skulrango skigiparangna on·enga gitan pilak man·gni TA/DA-rangko on·china dabiangkugen ine parakaha.

Inditan ru·uta bilsirangonin adhoc skigiparangni nangnikanirangko chu·sokate on·china dabiangengon, a·dok sorkari knachakjaengani gimin, uamangni dabianirangko chu·soate on·china mikkangchiba jingjengatanirangko dakangkuna ine jinma jak songe ra·chakangjolaha.

Indake ong·engon, re·baenggipa September 22 tarik pringni 11 bajio Khasi, Jaintia aro Garo Hills-ni adhoc skigiparang apsan tom·dake, Shillong Malki field-o jinma re·jomaniko dakna aro uni ja·mano joljol sima ari dongija sal wal asonge jingjengataniko ba sit-in-demonstration-ko dakna gita tom·anio jinma tik ka·angaha. Uandake, September 24 tariko Garo Hills, Region-ni gitaba Tura-o asonge jingjengataniko dakangna tik ka·e donangaha.

Adhoc skigiparang Meghalaya a·doko sak 8000 mang gnang, uamangni nokdangko chalaianio, dedrangko poraiatanio, sanna bananio, re·a doanirango aro songsalni dingtang dingtang kamrango dormaha chu·ongjani a·sel, adhoc Skulo skigiparang namen neng·nikaniko chagrongna nangenga ine FASTOM-ni Vice President Sanborn Jungai aganaha.