@ghdnews.in@

Tura, Nov 8, 2025: Re·anggipa August-ni 12 tariko Tura Chasinggre-ni mande saksa Silman M.Marak, A·chik Conscious Holistically Integrated Krima (ACHIK) Organisation-ni bimingko ra·e, Rongram Bajaro dokkan dakgiparangoniko dagrange tangka galenba, mirong aro me·surangko skatang ra·angahani gimin, ACHIK Rongram Regional Unit-ni General Secretary Rongram Pulis Outpost-o badi (FIR) ka·aha.

Badi ka·ani jagni ja·man, ua mande mijal chong·motan, November 7 tariko Rongram Pulis Outpost-ona re·bae, Pulis Officer In-Charge-ni mikkango, indake mikkangchi ACHIK Organisation-ni bimingko ra·e ong·gija kamrangko ka·taijawaha ine ku·rachakenba, pulisni mikkango ACHIK Organisation dolna see-jote on·angaha, ine ACHIK Organisation-ni dilgiparang u·iataha.

Uni gimin mikkangchi je manderangan, ACHIK Organisation dolko namgija biming man·atna miksonge, ong·gija kamrangko ka·genchimode, ua manderangni kosako ACHIK Organisation niam gita raka ja·kurangko de·anggen aro darangkoba kema ka·ani dongjawa, ine mikkrakataniko on·ataha.