Tura, May 23,2025: A·chik jatna gamchatgipa aro ra·gatna nangchongmotenggipa Garo Customary Law (GCL), ba A·chik jatni bidingo niam bidik ba niam sunduk-ko approve ka·na gita Governor-ni office-ona sokatanina A·chik Conscious Holistically Integrated Krima (ACHIK) Krima Council HQ, Tura a·dok sorkariko mittelataha.

Ia GCL-ko Garo Hills Autonomous District Council (GHADC)-ko chalaienggipa Executive Committee (EC) bilsi bongani gisepo, ian skanggipa Governor-ni Office-ona ia GCL-ko approval-na watatahani gimin, GHADC-ni EC-rangkoba ACHIK Krima Council, mittelataha.

Governor ia GCL-ko nipiltaina gita bil gnang. GHADC-ko chalaianggipa gitcham EC-rangba chang gittamna kingking Governor-ni approval-ona watataha, indiba Governor ra·chakjaha aro watatpilaha. Indiba da·o ong·enggipa EC-rang ia GCL-ko bilsi bongani gisepo Governor-ni office-ona watdoattaiaha, uni gimin Governor ia GCL-ko approve ka·telna nangachim, ine ACHIK Krima Council parakataha.

Ia chango GHADC-ni MDC-rang term bon·angachibara watate, ia GCL-ko Governor approve ka·jaode, da·o ong·enggipa GHADC-ni Executive Committee, A·chik jatna dakmikgipasan ong·aigenok. Indiba ia GCL-ko Governor approve ka·bebeode, GHADC-o asongenggipa MDC-rang, A·chik jatna ka·sabebea aro kam ka·bebea ine A·chik jat gimik ma·sichina aro ian skanggipa A·chik jatni Ma·ambi ong·gen, ine ACHIK Krima Council janapataha.