Tura, Mar 8,2025: A·chik Holistically Integrated Krima (ACHIK) Council, maming lekka gri aro niam pe·e koela salenggipa truck gariko re·na on·ani gimin, Rongjeng Pulis Station-ni Officer-In-Charge (OC)-ni kosako West Garo Hills a·jani Deputy Inspector General of Pulis (DIG) Western Range-na badi ka·doangaha.

ACHIK Council-ni parakatani gitade, re·anggipa Bristibar walni 7:30 bajimango uamang, Nongchram-o tom·a matchote re·bapilengmiting somoio, koela salgipa AS-18C 4777 truck gariko Rongjeng bazar-o nikenba ua gariko neng·takate sing·sandion, ua gario maming lekka gri koela salenga ine nikna man·aha. Iani bidingo ACHIK Council-ni dilgiparang bakan Rongjeng Pulis Station-na koborko on·ataha, indiba ua biapona sokbaon, Rongjeng Pulis Station-ni OC, ua gariko rim·gija, ACHIK Council-ni member-rangkosa ka·mikkenatpilskaha.

Uandake aditani ja·mano dolsa manderang, ua biapona re·bae, ACHIK Council-ni member-rangko ka·mikkenatna a·bachengaha aro indakmiting somoio Rongjeng Pulis Station-ni OC, niam gri koela salanggipa gariko re·angna watataha. Niamko rakkigipa pulis officer ong·e, uni ong·gija kamna chakpaaniko on·aniara, niam gri koela badinganio jak dongpaaniko mesokani ong·a. Uni gimin ua police officer-ni kosako inquiry ka·china aro uni kosako rakgipa ja·kurangko de·china ACHIK Council dabienga, ine DIG Western Range-na badi ka·e seatgipa FIR-o ACHIK Council-ni General Secretary Happynews Marak parakataha.

Uni gisepon maming ja·ku de·anirang dongjagenchimode, chubata gadangona badi ka·doangskagen ineba ACHIK Council parakataha.