Tura, May 15, 2025:May 17 tarik Sonibar salo Tiranga Yatra-ko Tura-o ong·atenga. Ia Tiranga Yatra-ko ong·atani miksongara, India a·songko warachakgipa sipairangko aro a·songni Matgrikrangko mittelpilskana aro uamangna bi·chakna, a·songni Nisanko ra·e, bike rally-ko ong·atenga. Ia bike rally-ko ong·atna skang District Auditorium-o kan·dikgipa tom·aniko ong·atchengen, uni ja·mano rally-ko ong·atgen, maina da·o dakgrikani bon·aha, ine Tura-ni MDC aro BJP-ni State Vice President Bernard N.Marak parakataha.

Jemangan jat aro a·songna ka·saa aro rasong chaa, re·bae bakko ra·na ra·etokpachina sakantikon Marak mol·molataha.

Tura MDC-ni parakatani gitade, Tiranga bike rally-ko Tura District Auditorium-oni a·bachenge, Tura bajarko nappake Hawakhana aro Ringre gita Auditorium-ona re·bapilgen.

Uni gimin, chadamberang, ma·a paarang aro dingtang dingtang political dolni dilgiparang, Mondolini dilgiparang, NGO-rang, Civil Society Group-rang aro gittimani dilgiparang pilakon Tiranga rally-ona Marak okamatenga.

Ia Tiranga Yatra-ko ong·ataniara politicis-ni gita ka·a ong·atja, pilak political dilgiparangan a·songni namgnina bakko ra·na man·aia. Ia program-ko ong·ataniara Sipairang dakgrikanio bobilrangko cheahani giminsa uamangko mande ra·pilskaaniko dakna, uamangna aro uamangni nokdangna bi·chakna gitasa ong·atenga. Maina uamang ka·dongbee, neng·takpilgija a·songko warachakaha aro chel·chakaha ine Marak parakataha.