Tura, April 6, 2026: BJP, Garo Hills-ni a·kawe jolrango donggipa tribal manderangni balance-ko tik ka·na ba name tariapilna miksonge kamrangko ka·enga, maina a·kawe jolrango niamgri napsrukbae songdonggipa rorirang nangana bataha. 1971 bilsio Congress sorkarini somoio East Pakistan-ko bilding bildang dakatani a·sel Garo Hills-ni a·arangna, bading-chiwalanirangna aro gipin man·gnirangna dingtangmancha on·gimin niamrangko dingtangataha, ine Tura-ni MDC Bernard N.Marak parakataha.

Iani a·sel, bak dakani (partition) ja·man, political dilgiparang niamgri napsrukbagipa manderangna pilak cholrangko on·ahani giminsa, a·kawe jolo donggipa tribal-rangni biaprango gipin biaponi songdonggipa manderang minority ong·skaengjok. Uni gimin, Bangladesh a·songoni niamgri napsrukbae songdongipa manderangko altue ma·sina gita, Special Intensive Revision (SIR)-ko dakchina Garo Hills-o songdongkamgipa manderang pilakan apsan ku·monge ku·rang on·na nangenga, ine Tura-ni MDC parakataha.

“Sorkarini ra·gimin dingtang dingtang politics-ni niamrang kakket ong·jaenga, aro ian Constitution-o ba Sorkarini Niam-o dongimin, Sixth Schedule-ni A·brio songdonggipa chong·motan, Hill Tribal-rangna on·gimin bilrang aro cholrangko gimaatenga. Garo Hills-ona niamgri gipin biaponi re·bagiparangna, apsan cholrangko on·e, man·gnirang aro dingtang dingtang kamrangko on·na ku·rachake, political dilgiparang an·tangtangna vote bank-rangko tarienga. Indake gital re·baggiparangko champengsojani a·selsa, batanggimin bilsi bongani gisepon, GHADC constituency-ni bang·a polling station-rango, voter-rang bang·batroroaniko nikna man·enga,” ine Marak parakataha.