Tura, March 17, 2026: Garo Hills-o so·sojengjeng ong·anirang namsrangkujaengani gimin, West Garo Hills a·jani Pulisrang salanti dakrongenga gita, March 16 tarik Sombar attamoba Araimile New Tura-o Naka Checkingko ka·mitting somaio, bang·a manderangko gate ra·baenggipa garirangko dongdipate, am·sandianiko dakengon, pulisrang bang·a kengnigipa ba mandeko saknaatgipa bosturang jekai atte, kukiri, haturi, jompol, rexo blade, rod, badil, go·ol aro uandakgipa dingtang dingtang bosturangko garirangoniko man·aha.

Ia bosturangko a·kawe jolo jatgnini gisepo ding·chaogrike kajia ong·enggipa biaprango dakgrikna gita ra·angenga ine pulisrang ma·sina gita man·aha.

West Garo Hills a·jani Superintendent of Pulis (SP) Abraham T. Sangma-ni u·iatani gitade, ia kenchakna nanggipa bosturangko pulisrang ra·sekaha. Uandake, garirango re·baenggipa manderangko pulisrang rim·enba sing·sandianiko dakaha.

Ua manderangni pulisrangna aganani gitade, ACHIK NGO dolni didiani gimin, a·kawe jolo dakgrikna re·angenga ine aganchakaha.

Iandakgipa obostarang ong·kuengani gimin pulisrang kajia golmalrangko namatna dingtang dingtang biaprango dontongijan am·sandianiko dakuenga ine SP parakataha.