Shillong, April 5, 2026: Confederation of Meghalaya Social Organisation (CoMSO) ta·raken Electoral Roll-rangko Special Intensive Revision (SIR) dakchina aro Constitution (Scheduled Tribes) Order 1950-ko taridapchina a·dok sorkariko didiataha.

Iani bidingo a·dokni Skotong Minister Conrad K Sangma-na sedoatenba, Electoral Roll-rangko SIR dakna aro niamrangko taridapna gita sal 45 somoiko a·dok sorkarina on·angaha. Ia sal 45-ni gisepo kamrangko chu·sokatjagenchimode, jingjengataniko a·bachengatgen ine CoMSO, mikrakataniko on·ataha.

Skotong Minister-na sedoatgipa chittio CoMSO-ni Chairman Roy Kupar Synrem-ni parakatani gitade, Meghalaya a·dokni Tribal jatrangko chel·chakna gita Electoral Roll-rangko ta·raken, SIR dakna nanga aro Constitution (Scheduled Tribes) Order 1950-ko taridapna nanga. A·doko Electoral Roll-rangko SIR dakna gita ta·raken, Election Commission of India (ECI) baksa agangrikatchina ua, a·dokni Skotong Minister-ko didiataha.

“Meghalaya a·dokara Tribal jatrangni a·doksa ong·a, indiba gipin biaprangoni napbae songdong a·chaenggipa manderangko electoral roll-rango segatna namen kenchakanirang donga. A·doko songdongkamgipa manderangkosan electoral roll-rango segatna gita Special Intensive Revision-ko dakchina, chinga a·dok sorkario dabienga” ine Synrem parakataha.

Constitution (Scheduled Tribes) Order 1950-ko taridapna nangengani gimin, janapatengon, ia niamko gipin Tribal-rang ma·sisretjachina aro Meghalaya a·dokni Tribal manderangkosan electoral roll-rango segatna gita ia niamko taridapna nanga ine CoMSO-ni Chairman aganaha.