@ghdnews.in@

Shillong, Jan 16, 2026: A·dokni Skotong Minister Conrad K. Sangma a·doko niamgri napsrukbagiparangko champengna gital, Immigration and Foreigners Act, 2025-o ILP baksa apsan dakgipa niamko chapatpna miksongengani gimin chanchirimaniko dakna gita pilak dolni dilgiparangko aro songsalna dangdike on·enggipa dolrangko okamataha.

Niamni bidingo tale ma·sichenggija jegalenggiparangna aganchakatengon, ia niamni bidingo talbate ma·sie ra·na gita pilak dolrangkon apsan tom·e chanchirimna Skotong Minister okamataha.

Iade Inner Line Permit (ILP), Immigration Act ba MRSSA-ni gimin ong·ja, indiba niam gri napsrukgiparangko champengna nangani kattasa ong·enga ine janapatenba, jinma apsan tom·e chanchirimanichisa nambatgipa niamkode ra·gatna man·gen ine Skotong Minister aganaha.

A·dok sorkari, darangni ku·pattianiko knachakna kusi ong·a aro je dingtangatna nanganirang donggenchimode, uarangko dingtangate aro manderangni jajrenganiko naljoke rakkiani gisepon rakgipa aro mangrakgipa niamrangko ra·gatanggen, ineba ua agandapangaha.

Skotong Minister, Meghalaya Residents Safety and Security Act (MRSSA)-ko a·bachengatachim, indiba tangka paisarang chu·ongjani a·sel neng·nikanirangko chagrongna nangenga ine Dr. Mukul Sangma-ni matnanganina aganchakataha. Uni gisepon, ia niam aro uno ja·rikna on·gimin niamrang mongsongbate napani aro ong·katani ramarangko tarianio name meli ma·gapjaenga ineba ua agandapangkuaha.

Ia neng·nikani a·selsa, a·dok sorkari gital ba namdapatgimin niamni bidingo chanchirimaniko dakenga, indiba iano bak nangpagipa pilak dolrang baksa agan-golpogrikaniko daka ja·mansa, jekoba tik ka·anggen ine Sangma parakataha.