@ghdnews.in@

Shillong, Feb 8, 2026:: Re·anggipa February 5 tarik Bristibar salo East Jaintia Hills a·jani Umpleng Pulis Out Post-ni ning·o ga·akgipa Thangsko jolni Mynsyngat-o niamgri koela bikotenggipa a·damo Dynamite goprete bang·a manderang siani ja·man, Voice of the People Party (VPP)-ni dilgipa Ardent Miller Basaiawmoit, a·dokni skotong Minister Conrad K Sangma-ko Skotong Minister-ni biapko watchina dabiaha.

Niamgri koela bikotongenggipa a·damo gopretani a·sel sak 27 manderangni janggirang gimaaha aro adita manderang saknaako man·tokaha. A·doko
niamgri koela bikotengani gimin, iandakgipa a·selrang ong·taitaianiara sorkariko chalaina changgijani a·sel ong·enga ine VPP-ni President, sorkariko jaksi otaha.

Uni gimin Skotong Minister biaptangko watna nanga aro an·tangni daito gnanganiko ku·rachakna nanga ine aganaha.

“Changni chang koela a·damo iandakgipa a·selrang ong·e, manderangni janggirang gimaatako man·engon, maidake Skotong Minister a·doko dilkugen” ineba VPP dilgipa sing·doangaha.

Indake niamgri koela bikotaniko champengjani a·sel batanggimin bilsirangonin, badita manderang an·tangtangni janggirangko gimaataha ine Basaiawmoit aganaha.

Re·anggipa Bristibar salo a·sel ong·aniara, batanggimin somoio Ksan-o koela a·kolo chi gapdoe a·sel ong·aming maming dingtangani gri aro bang·a koela a·damrangon iandakgipa a·selrang ong·aha, ineba VPP dilgipa aganaha.

Ia a·selrangna sorkariko matnangatenba, compensation-ko on·aniara maming miksongani gri, mande simanjok iara mai gisik gnangani, sigimin mandeko tangkachi re·bapilna ba tangatpilna man·jawa, ua aganaha.

Iandake a·sel ong·aniko raken jegalatenba, niamgri bikotenggipa koela a·kolrangko a·dok gimiknikon sandie chipatchina aro a·sel ong·anio jak donggipa gimikkon rim·china, a·dokni BJP dolni ku·wattimgipa Mariahom Kharkrang aganaha. Unbaksana a·sel ong·anio sianggipa manderangna aro uamangni nokdangrangna kalimpaaniko parakate, sianggipa mande sakprakni nokdangrangna gong lak 2 tangkako on·na ku·chakatanina, Prime Minister Narendra Modi-koba Kharkrang mittelataha.