Williamnagar, Oct 19, 2024: A·dokni PHE Minister Marcuise N.Narak Sukrobar salo East Garo Hills a·jani Samanda, Songsak aro Dambo-Rongjeng Block-ni ning·o game ge·e cha·giparangna aro Producer Group-rangna FOCUS Program-ni cheque-rangko Williamnagar DC Park-o suale on·angaha.

Indake ua tom·anio, East Garo Hills a·jani Deputy Commissioner Vibhor Aggarwal, ADC Ripamchi N Sangma, block ge·gittam-ni BDO-rang aro dingtang dingtang department-ni official-rang dongpae bak ra·angaha.

Game ge·e cha·giparangna aro producer group-rangna FOCUS-ni cheque-rangko suale on·anio a·dokni PHE Minister, jinmana aganprakengon, a·doko songdongenggipa manderangni mongsonggipa kamara game ge·e cha·anian ong·a. Meghalaya sorkari, game ge·e cha·enggipa manderangna tangka paisachi dakchakanirangko on·enga aro Meghalaya a·dokko billion 10 dollar economy ong·atna Skotong Minister Conrad K Sangma-ni niksamsoani ong·a.

Uni gimin game ge·e cha·giparangni aro producer group-rangni man·dapanirangko bariatna sorkari dingtang dingtang ja·kurangko de·angkugen ine parakangaha.

A·doko gama ge·anirangko tang·doatna gita sorkarini ra·gatgipa dingtang dingtang scheme aro project-rangni gimin talatangengon, Skotong Minister-ni niksamsoaniko chu·sokatna sorkarini on·enggipa tangka paisarangko name jakkalchina Marak, game ge·e cha·giparangko aro producer group-rangko didiangaha.

Uandake, East Garo Hills a·jani ADC Ripamchi N Sangma-ba jinmana aganprakengon, FOCUS program-ni ning·o East Garo Hills a·jani dol 464 producer group-rangna Meghalaya sorkari, tangka paisarangko dakchakenga aro East Garo Hills a·jao gama ge·ani kamrang dingtanganiko man·engaha ine aganangaha.

Apsan salo a·dokni PHE Minister, CM Impact Program-ni ning·o Williamnagar jolni wilwilao donggipa dingtang dingtang skulrangna guide book-rangkoba suale on·angjolaha.