Shillong, Mar 24: Garo Hills Autonomous District Council (GHADC) eleksino susagipa candidate-rang Scheduled Tribe (ST) Certificate-ko nangtelgipa ong·atna, GHADC-o taridapgimin niamrangko Monggolbar salo, Meghalaya a·dokni Governor CH Vijayashankar ra·chakaha.

Iani bidingo a·dokni Skotong Minister Conrad K Sangma, Social Media-o jinmana parakatenba, ia niamrangko ra·chakahani gimin, a·dokni Governor-ko mittelpilangaha.

1952 bilsio GHADC-ko songchengaonin ia niamrangko taridapa dongkujani a·sel, GHADC eleksino Tribal ong·gijagipa manderang bak ra·na man·enga, indiba Sombar salo, National People’s Party (NPP)-chi dilenggipa GHADC-ni Executive Member-rang Special Session-ko ong·ate, ia niamrangko taridape pass ka·ani ja·man, ia niamrangko Mongolbar salo a·dokni Governor ra·chakaha.

Ia taridapgimin niamko pass ka·ani ja·man, ia salara, GHADC-ni ‘Ma·ambio’ gisik ra·na krabeani sal ong·a ine Sombar salo Skotong Minister parakataha.

District Council-rangara, a·bri jolo songdongenggipa Tribal manderangna miksonge on·gimin bimangrang ong·ani gimin, iandakgipa niamrangko ra·gatna nangchongmota aro ian GHADC-na namen gisik ra·beani sal ong·a ineba Sangma agandapataha.

Ia niamko ra·gatchina bilsi 74 batpile A·chik Tribal-rang dabitokengon, da·alona kingkingba dingtang dingtang sorkarirang District Council-o ia niamko ra·gatna man·kuja, ine Skotong Minister aganaha.

District Council-rangara Tribal manderangna dingtangmancha on·gimin bimangsa ong·ani gimin, ia niamko taridapna nangaha aro iako Garo Hills-o songdongenggipa Non-Tribal-rang chong·motan Tribal ong·gijagipa manderang ma·sichakgen, ineba Sangma ka·dongchakaniko parakataha.