Shillong, May 2, 2025: Bristibar salo Cabinet tom·e chanchirimaniko dakenba, SSLC porikka pass ka·gipa chatro chatrirangna Higher Secondary skulrango poraina man·na gita a·dokni dam 6 sorkari Secondary skulrangko Higher Secondary-ona ra·doatenba, dam 11 Higher Secondary skulrango gital Stream-rangko on·dapatna tik ka·angaha.

Cabinet tom·a matchotani ja·man kobor ra·timgiparangna aganangengon, SSLC porikkako pass ka·gipa chatro chatrirangni namgnina a·dokni dingtang dingtang skulrangko namdapatna a·dokni Cabinet Minister aro MDA sorkari ku·wattimgipa Paul Lyngdoh parakataha.

“A·doko lekka poraniko tang·doatna nangengon, Higher Secondary skulrango ge 12,000 donggipa seat-rang chu·ongjaenga aro Higher Secondary skulrango stream-rang apsan ong·jaenga,” ine Paul Lyngdoh aganaha.

Dingtang dingtang skulrango chatro chatrirangna seat-rang chu·ongjaengani gimin, a·dokni dam 6 Secondary Skulrangko Higher Secondary gadango ra·doatna Cabinet tik ka·aha ine Lyngdoh parakataha.

Higher Secondary gadango ra·dona sorkarini tik ka·gimin sorkari skulrangara, East Jaintia Hills-ni Rymbai Secondary School, Umthlong Nongkhliew (Arts & Science Stream gnang), Nongtalang Secondary Skul, Tirot Sing Memorial Secondary Skul, Tura Public Skul aro Jowai Public Skul skulrangko Higher Secondary-ona ra·doatanichi ge 9000 seat-rangko on·dapna sorkari ka·dongenga ineba Lyngdoh parakataha.

Higher secondary skulrango gital stream-rangko ra·gatna, tom·anio Cabinet ra·chakaha ine janapatengon, Science Stream-ko Nongkhlaw-ni Tirot Sing Memorial HS Skulo Commerce Stream-ko Tura Govt Boys HS Skul, Dalu Secondary Skul, Baghmara HS Skul, Jowai-ni Govt Boys HS Skul aro Sokha HS Skulo ong·gen ine Cabinet Minister aganaha.

Us skulrango Arts aro Science Stream-rang dongahani gimin da·o Commerce Stream-koba man·gnok, ine ua aganaha.

Je skulrangon Arts Stream-rang dongkujachim, uandakgipa skulrango Arts Stream-ko man·gnok, ua skulrangara, Jirang HS Skul, Resubelpara HS Skul aro Mawkyrwat-ni Maharam HS Skul ong·achim.

Una agreba, North Garo Hills-ni United Kharkutta HS Skul aro Malangkona HS Skulo Science aro Commerce Stream-rangko ra·gatna Cabinet tik ka·angaha ine Lyngdoh parakatha.

Us skulrangko ra·doatanichi bilsio gong kror 10 tangkarang koros ong·gen, ua tangkarangko koros ka·anichi sorkari, a·dokni chatro chatrirangna namgipa lekka poraniko on·na ka·dongenga ineba Lyngdoh parakataha.