Tura, Sept 27, 2025: West Garo Hills a·jani Dadenggre Pulis Station-ni ning·o donggipa A·dinggre aro Sadolpara songrango dokkan dakenggipa manderangniko re·anggipa September 11 tariko ra·sekdrae ba daket dake ra·ani bidingo West Garo Hills a·jani Pulisrang sak 8 manderangko rim·aha.

West Garo Hills a·jani SP AT Sangma-ni u·iatani gitade, ra·sekdrae ra·gipa dolsa manderang buchuma budeparangni dokkan ge·gnio napdrae, mobile phone-rang, bosturang aro tangka gong hajal 6,000 aro ge·gipin dokkanoniko gong hajal 68,000-ko ra·e katangenba, dokkan nokgipa sakgnikon mata bua man·pile dokenba saknaate donangaha aro budepa saksakode sibokpile dokenba, dokkan sambao donggipa buringo gale donangaha. Indiba rasong gnangbee budepa tangpilaha aro uko bakan hospital-ona ra·angaha. Ua obostarang ong·ani ja·mano, Dadenggre Pulis Station-o Sections 310 (2) / 118 (1) / 3(5) BNS-ni ning·o Case No. 08/2025 aro Sections 309 (4) / 118 (1) / 3 (5) BNS-o pangchake Case No. 07/2025-ko segataha.

Ua obostani bidingo West Garo Hills a·jani pulisrang ta·raken am·sandianirangko dakna a·bachengaha aro West Garo Hills-ni dingtang dingtang biaprangoniko dos dakgipa manderangko rim·aha.

Rim·a man·gipa manderangara bilsi 27 ong·gipa Damal A·sim-oni Paul B. Marak, bilsi 30 ong·gipa Jengjal-oni Rajiv B. Marak jekon Lakingsbirth ineba mingachim, bilsi 31 ong·gipa Damalgre Okkapara-oni Silwen Ch. Sangma, bilsi 37 ong·gipa Rengsangre-oni Rebellious A. Sangma jekon Klen ineba mingachim, bilsi 25 ong·gipa Tikrikilla joloni Jakbrash Jakson R. Marak, bilsi 20 ong·gipa Tengseng jekon Tatlu R. Marak ineba mingachim, bilsi 25 ong·gipa Bethani R. Marak aro bilsi 28 ong·gipa Sillieng B. Sangma ong·achim.

Daket dakgipa denggu manderangni ra·sekdrae ra·mitting somoio jakkalgipa motorcycle-ko pulisrang thana-ona ra·angaha aro dokkanrangoniko cha·uanggipa mobile phone-rangkoba rim·a man·gipa manderangoniko man·aha ine SP parakataha.