@ghdnews.in@

Tura, Jan 28, 2026: Garo Hills a·jao songdongenggipa A·chikrangko a·songtang chigatangko wate katchina ISIS-K bobil dol ine A·chik jatko ka·mikkenate segimin poster-ko New Tura, Law College jolo, bijoli krongo tape donako nikani ja·man,
Pulisrangni aganani gitade, iandakgipa poster-rangko ia biapo tape donana agrede, gipin biaprangode nikdapa dongkujaenga aro iandakgipa kamko ka·aniara manderangni gisepo ding·chaoatna aro kenjagokatna miksongani ong·a ine janapataha.

Ia tapgimin poster-ko ra·galaha aro tale am·sandina aro porikka ka·e nina watataha aro iani bidingo Araimile Pulis Station-o mokordomako segatenba am·sandianiko dakengaha ine pulisrang parakataha.

Indake, manderangni gisepo kenjagokaniko aro jatska jatgipin baksa kajia golmal ong·atna miksonge ia poster-ko tapgipa manderangko am·sandienga aro uamangni kosako niam gita raka sastiko on·gen ineba pulisrang janapataha.

Iandake Social media-o ba gipin platform-rango seanina kenjagokna nangja aro dilsretako man·a nangja ine West Garo Hills a·jani SP AT Sangma sakantikon mol·molataha.

Saoba iandakgipa kam ka·aniko nikgenchimode, bakan sepangbatgipa Pulis Station, Beathouse, Outpost ba Tura-ni Pulis Control Room (PCR)-ona ia +918837423053, +917005530510 aro +919089199064 mobile number-ona call ka·e u·iatchina songdongenggipa sakantikon mol·molataha.