www.ghdnews.in

Tura, Feb 26, 2026: India a·songni mikron nikgijagiparangko Football Team-na dingtang dingtang a·dokrangoni kal·giparangko re·baenggipa, April jani 16 tarikoni 19 tarikona, Kerala a·dokni skotong songjinma Kochi-o seokaniko dakanio Meghalaya a·dokoniba, Garo Blind Football Team (GBFT)-oni sakgni kal·giparang Klingson D Marak, mongsongipa goal chipe kal·gipa aro Visiondo M Sangma mongsonggipa goal keeper bak ra·anggen ine u·iataha.

Uamangoni Klingson D Marak, ia 2026 bilsio India a·songni International Team-na seokako man·taie, re·baenggipa jao Japan a·songo ong·atenggipa Men’s IBSA OCEANIA BLIND FOOTBALL CHAMPIONSHIP Division 1-ni kal·susaanio kal·na gita seokako man·taiaha.

Kilingson Marak, batanggimin bilsirango India a·songni bang·a dingtang dingtang
biaprangchi re·ange kal·eaha aro indaken uko a·gilsak gimiko, “Blind Messi” ine biming donaha. Indake Marak, India a·songna aro Meghalaya a·dokna mikkim rasongko ra·baaha, ine Garo Blind Football Club-ni mongsonggipa Coach ba Secretary Jhonlavin Ch. Marak parakataha.