Tura, May 13,2025: India aro Pakistan a·song damgnini gisepo so·sojengjeng ong·engon, adita salrangna skang A·chik chadambe saksa a·songtangko chonnike, Pakistan-na chakpaaniko Social Media-o parakatani ja·man, iani bidingo A·chik jat gimiko man·gope, ku·wattogija kattarangchi Social Media-o post ka·skaahani gimin, mande saksani kosako A·chik State Peoples’ Front (ASPF) Garobadha Regional Unit, Garobadha OGC-ni officer incharge-na badi ka·doangskaha.

ASPF Garobadha Regional Unit-ni badi ka·anio parakatani gitade, ua mandeara Gandhipara songni Seyamal Koch ong·achim. Ua A·chik jat gimikko man·gope ku·wattogija kattarangchi chonnike Sonibar salo, Facebook Social Media-o post ka·aha.

“Uan Silgring Sangma-ni video-na aganchake post ka·gipa ong·achim, indiba uni aganchakanio Seyamal Koch, A·chik jatni bimingko ra·esa ku·wattogija kattarangchi post ka·aha. Ian Garo Hills-o dingtang dingtang jatrangni tom·tome aro meli nangrime donganiko kajia ka·ani ong·a”, ine ASPF Garobadha Regional Unit-ni President Sanjhu T Sangma parakataha.

Ia mandeni kosako Bharatiya Nyaya Sanhita (BNS) 2023-ni Section 356, Section 196, Section 352 aro Section 353-ni ning·o pangchake mokordoma ka·china aro uko dosni kri rim·e niam gita sastirangko on·china ASPF Garobadha Regional Unit, didiataha.