Tura, Jan 2, 2025: West Garo Hills a·jani saksa boxing-o gisik nanggipa, Senior Boxer aro West Garo Hills Boxing Association (WGHBA)-ni Secretary Balnas A·gitok Sangma, gnigipa changna 2025 bilsini January 6 tarikoni 13 tarikona Utter Pradesh a·dokni Bareilly songjinmao ong·atenggipa, 8-gipa Elite Man’s National Boxing Championship-o A·chikrangoni saksa mangmang Meghalaya a·dokko represent ka·na gita seokako man·aha ine koborna u·iataha.

Bilsi 25 ong·gipa Balnas A·gitok Sangma Tura Ballonggre-oni ong·achim. Ua re·anggipa 2023 bilsini August 17-19 tarikona Ri-Bhoi a·jani Kurkalang-o ong·atanggipa BFI Elite Man’s Boxing Championship-o bakko ra·e, Silver Medal-ko man·aha. Uandake, Shillong-o ong·atanggipa 2020 bilsini 3-gipa Meghalaya Games-o Silver Medal-ko man·aha. Uandake, Shillong songjinmao ong·atanggipa 2022 bilsini 4-gipa Meghalaya Games-o Gold Medal-ko man·aha aro Tura-o ong·atanggipa 2024 bilsini 5-gipa Meghalaya Games-oba Gold Medal-ko man·taiaha. Apsandaken, Shillong-o ong·atanggipa 2020 bilsini North East Olympic Games-oba Balnas A·gitok Sangma Bronze Medal-ko man·aha.

Uni (Balnas) mingnamgipa gun aro changa sapanichi A·chik jat aro a·songna namen katchabeani aro mikkim rasong ong·a.