Tura, March 27, 2026: Adita salrangna skang Garo Hills-o dal·begipa kajia golmalrang ong·angani gisepon, A·chik agent-rang A·chik jatni kosako re·e, bangal rorirangko rimbae Garobadha aro Damalgre bajar-rango na·tokrangko palatskaenga. A·chik agent-rang jemangan, District Council-oniko na·tok supply ka·na licence tarie, jatskani bajar antirango pale sim·e cha·aniko bon·chipatna, bangalrangko baju dake, A·chikrangko dokna satna am·e dagrangenga, ine koborna u·iataha.

District Council, ua agent-rangna na·tokrangko supply ka·na gita licence-ko on·ahani gimin, ia licence-o pangchake, A·chikskani kosako ong·gija kamrangko ka·enga aro an·tangtangni na·tok supply-oniko dokna satna am·e na·tokrangko ra·atenga, indiba A·chikrang ra·jaode, bajar antirango dokkan dakna aro palna sim·na man·jawa ine dagrangenba, A·chikskaoniko gong 500/- fine ra·enga.

Uamang (agent-rang) A·chikrangko sichipatna Pipulbari-ni bangalrangko rimbae, Damalgre aro Garobadha bajar-rango na·tokrangko dam komierang palatenga ineba u·iataha.

Iani bidingo Garo Hills Trader Association, A·chik agent-rangna raken mikkrakataniko on·ataha. Uni gisepon, uamang manigija bangalrangko rimbataie Garo Hills-ni je anti bajar-rangoba, na·tokrangko ba gipin bosturang palattaia ong·ide, ua agent-rangni kosako rakgipa ja·kurangko de·anggen badi (FIR) ka·gen ine parakataha.