@ghdnews.in@

Tura, Feb 6, 2026:Tura songjinmani dingtang dingtang bajar-antirango jekai Tura Super Market, Tura Na·jing Bajar, Dermile aro gipin gipin biaprango me·su samjakrangko pale sim·e janggi tangenggipa manderang, February 5 tarik Bristibar salo Civil Society Organisation-ni dilgiparang aro dingtang dingtang NGO-rangni dilgiparang baksa Tura Mothers’ Union Secondary Skulo tom·e chanchirimaha.

Uamangni tom·e chanchirimaniara, gipin biaprangoni gipin jatrang Tura-ni wilwilao donggipa dingtang dingtang bajar antirangona skatang re·bae sam-bisi gnanggipa me·su samjakrangko ra·bae pala sim·nirangko champengna aro A·chik a·songni manderangko chel·chakna aro A·chikskaan a·doktang chigatango me·su samjakrangko pale sim·e janggi tangchina re·chakatani ba miksongani ong·a.

Uandake mikkangchi ia miksonganiko kimkim ong·e mangrakatna aro bilakbate kamrangko ka·angna man·na gita, A·chik a·songko ganggopenggipa gipin jatrangoniko naljokatna, A·chik A·songni Bading Chiwalgipa Dol (AABCD)-ko bikote, gital dilgiparangkoba seokangjolaha.

Seoka man·gipa AABCD-ni dilgiparangara Jaynie Ningring N.Sangma-President, Balkarin Ch.Marak-Vice President, Pilbirth Ch.Momin-Secretary, Jist A.Sangma-Joint Secretary, Prejia Momin, Bristillina R.Marak, Raksilbath Ch.Momin aro Pia N.Marak Organising Secretary-rang. Unbaksana Sebastian Sangma-Accountant, Hebalin R.Marak Treasurer aro Eightenbirth R.Marak-Audit.