@ghdnews.in@

GHD News, Tura 20, 2025: Butbar salo Garo Hills-ni u·igipa ma·sigiparang aro nangrimgimin NGO-rang Tura songjinmao tom·aniko ong·ate, Environmental Protection-ni gimin chanchie ge·sa gital dolko bikotaha, ine koborna u·iataha.

Tom·bagipa sakantian apsan ku·monge ja·ku ga·genchimode, ong·telaigipa buring bolgrimrangko, chiring chibisikrangko aro do·o matrangko ripingna man·gen aro mikkangchina niksamsoe, kamrangko ka·angna ia gital dolko bikotaha ine parakataha.

Mikkangchina simsakjagenchim ong·ode, A·chik A·songko po·rongrong ong·aignok aro dedrang su·drang branggnok, unode da·alo singdongenggipa manderangkosa biming man·aignok. Uni gimin niksamsoe, A·chik sakantini jak goaniko ku·rang on·paaniko nangenga. Indake, ia dolni bimingko A·chik Joint Action Environmental Protection Forum (AJAEPF) ine donaha.

Seokako man·gipa AJAEPF-ni dilgiparangara Dr. Pletus K. Marak, President, Rev. Insting C. Marak, Vice President, Pa Pilbirth Ch. Momin, General Secretary, Pa Salgra Ch. Sangma, Joint Secretary aro dingtang dingtang Pressure Group-rangni President aro Secretary-rangko Executive Member-na seokangjolaha.

Ia dolko bikotani miksongara, Paromgre aro A·sakgre jolrango ong·telaigipa buring bolgrimrang, bol wa·ararg, do·o matrang aro chiring chibisikrangko ripingna, A·chik A·song gimikna dangdike on·na miksonge bikotaha. A·chik a·songni ong·telaigipa gam jinrangko ripinganipal batesa ong·siatengani gimin, Nokgipani pattigimin a·dok chigako, gam-jinrangko name ripingangna aro jinmani namgnina naljokaniko on·na miksonge ia dolko bikotaha, ine A·chik Joint Action Environmental Protection Forum-ni General Secretary Pilbirth Ch.Momin parakataha.