@ghdnews.in@

Tura, Jan 30, 2026: Garo Hills-o, ISIS-K bobil dolni bimingo A·chikrangko ka·mikkenate New Tura jolo poster tapani bidingo BJP dilgipa aro Tura-ni MDC Bernard N.Marak, a·dokni DGP-na sedoataha.

Marak-ni DGP-na seatgipa chittio janapatani gitade, je poster-on A·chikrangko 2027 bilsini gisepon, A·chik a·songko wate katchina ka·mikkenatahachim, uko tol·gipa ine ra·na man·jawa, maina uamangna ning·joljol kam ka·giparang dongnaba donga. Prevention of Atrocities (SC/ST) Act-o pangchake Sofior Rehman-ni kosako badi (FIR) ka·aha, je a·selrangko sandina a·bachengaha.

Bang·a Social Mediarango Garo Hills-ko an·tangtangni a·ja ine a·kangenba, A·chikrangko ka·mikkenataha ine chittio janapataha.

Sixth Schedule-ni a·jarangon, Assam Schedule-ni ning·o a·a pattarangko tarie donggiparang Garo Hills-o donga. Uamang Governor-ni ra·chakani gri ba niam gita ong·gija songdongenga. Khasi aro Jaintia Hills-o gita ong·gija, Garo Hills-o minggni a·selrangni gimin bal-boja ong·enga. Sixth Scheduled-ara dingtangmancha Tribal Rights ba bilko chel·chakna gita on·gimin ong·achim, indiba uano pattarangko General Schedule (Assam Schedule)-ni ning·o on·enga ine Marak, a·dokni DGP-na seatgipa chittio janapataha.

Re·anggipa January 9 tariko Rajabala Pulis Station-ni ning·o ACHIK dolni member saksako chadrape so·otaha, sawarang maina so·otahachim uani a·slerangkoba talkujaenga. Uni gimin iandakgipa a·sel obostarangko namedake Special Investigation Team (SIT) sandiatna nanga, haida uamang ISIS–K ine a·jao bobil dake chakatgipa dol baksa jak dongengnaba donga, jemangan jat basee nanggrikatna miksonge dakenga, ineba Marak janapataha.

Indake ong·engon, ia a·selko bil gnanggipa aino segatna nanga, a·selko sandina gita Special Investigation Team (SIT)-ko songna nanga, dosi dakgipako rim·enba bichal ka·na nanga ine BJP dilgipa, a·dokni DGP-ko didiataha.

Iandake denggu dakgipa manderangko maming dakeba watna nangja, maina ian a·songni naljokanina kenchakani donga ine janapatenba sandianio dakchakpagen ine Marak parakataha.