Shillong, May 8,2025: Dakgrikanio Air Raid ba Aircraft-rangchi chadrapani somoirangona manderangko tarisamsona aro mikkrakatanirangko on·na gita, Budbar attamni 4 bajio, Meghalaya a·dokni damgittam biaprang jekai Shillong, Jowai aro Tura songjinmarango, dingtangmancha mock drill exercise ba ranta ka·e nianiko daksninge mesokangaha aro ia mock drill exercise-ko ong·atanio siren-ko gam·atani ja·man, minit gnina bijolirangko kimitaha.
Iako dake mesokani miksongara re·anggipa April-ni 22 tariko, Jammu aro Kashmir a·dokni Pahalgam-o bobil dolrangni, sak 26 ramram manderangko chadrape skatang goe galani ja·man, India a·song gimikon, dakgrikani somoirango an·tangtangko naljoke rakkina tarisamsoe dongna gita, Union Home Affairs Ministry-ni ge·etaniko man·e, ia mock drill-ko ong·ataha.
Ia mock drill-ni bak gita Budbar attamni 6:30 bajio siren-ko gam·ataha aro joljol bijolirangkoba minit gnina kimitaha.
A·dokni damgittam biaprango mock drill-ko ong·atanio, Civil Defence Department baksa skulni chatro chatrirang, doctor-rang aro emergency service-o kam ka·enggiparang bak ra·angtokaha.
Indake, ia mock drill-ko Meghalaya a·dokosan ong·ataigija, India a·songni dingtang dingtang a·dokrango aro Salgro Salaram a·dok gimikon, dakangtokaha.
