@ghdnews.in@

Tura, February 4, 2026: Akhil Bharatiya Vidyarthi Parishad (ABVP)-ni dilgiparang re·anggipa January 9 tariko Goalgaon songo rorirangni chadrape so·otako man·gipa Matgrik Dilseng M. Sangma-ni nokdango dongrikenggipa manderangko mijal February 3 tariko grongna gita re·angtokaha.

Matgrik Dilseng Sangma-ni nokdango dongrikenggipa manderangko gronge, uano a·sel ong·ani gimin sing·sandie, ra·angaha. Indake ja·mano ABVP-ni dilgiparang Press Conference-ko ong·ate, ming 6 mongsonggipa point-rangko ra·e agan-talatangaha.

Dilseng M. Sangma-na aro uni nokdangna kakket bichalko on·china, sorkarini gamna nanganirangko ta·raken gamchina aro uko so·oatanio jak donggipa manderangko ta·rake rim·enba raka sastirangko on·china dabiangaha.

ABVP-ni National Secretary, Garo Hills-o ong·enggipa obostarangni gmin agan-talatangengon, Garo Hills-o Demographically dingtangahani gimin, a·dok sorkari ta·raken Special Intensive Revision (SIR)-ko ra·gatchina didiataha.

Garo Hills-o enomicallly aro politically ganggopna jotton ka·anirangko champengna aro Garo Hills-o songdongenggipa manderangko ra·dona kamrangko ka·nasa nanga ine aganangaha.

Non-Tribalrang mongsongbate, Bangladesh-oni niamgri re·napbagipa manderang Garo Hills-o songdong a·chae, Garo Hills-ni tribal me·chikrangko jik kime ba bia ka·e, bang·a conspiracy-ko dakenga aro economically bading chiwalanirangko ra·sekenga aro politically sason ka·na jotton ka·enga ine ABVP-ni National Secretary Kamlesh Singh aganaha.

Indake ong·genchimoba, a·dok sorkari dingtangmancha raka ja·kuko de·china didiatenba, A·chik jatni naljokanina dingtang System-ko jakkale niamgri songdongenggipa manderangko a·rikgalchina gitaba ua didiataha.

Garo Hills-o bang·a niamgri bading chiwalanirangko rim·krepengani gmin, janapatengon, Garo Hills-o man·gipa gue, keshewnut aro gipin bolam biterangkoba uamangsa bading chiwale, songdongkamgipa manderangni kosako sason ka·na aro rim·krepna jotton ka·enga ineba ua aganangaha.

Re·baenggipa Garo Hills Autonomous District Council (GHADC) election-o rorirangni ba muslimrangni susana chol ra·enganiko jegalangenba, GHADC election-o rorirang bak ra·na niam dongja, ian Indigenous manderangna dingtangmancha, Indian Constitution-ni ning·o on·gimin Sixth Schedule-ni bil ong·a. ia bilko maming dakeba muslimrang napbroke vote on·na aro susana man·ja. Uni gimin, Garo Hills-o sondongenggipa pilak manderangni jak on·achisa uamangko champengatna man·gen ineba Singh agan-talatangaha.