Tura, Mar 7, 2025: Da·o ong·atenggipa Assembly Budget Session-o Tura-ko Winter Capital songani bidingo A·chik MLA-rang ku·rang on·jaenga ine A·chik State People’s Front (ASPF), suk ong·gijaniko parakataha.

ASPF-ni parakatani gitade, Tura-ko Winter Capital songaniara Garo Hills-o manderangni ru·uta bilsirangna dabienggipa ong·achim, indiba iani bidingo Garo Hills-ni MLA-rang saksaba Assembly-o ku·rang on·jaenga ine parakatenba, an·tangtangni manderangna simsakgijaniko mesokani ong·a.

“Tura-ko Winter Capital songani bidingo Garo MLA-rangni ku·rang on·na sikjaengani gimin chinga suk ong·gijaniko parakna sika, maina Tura-ko Winter Capital songaniara Garo Hills-o namroro silroroaniko ra·bana, Garo Hills-o songdongenggipa manderangni ru·uta bilsirangna dabienggipa ong·achim,” ine ASPF-ni dilgiparang parakataha.

Tura-ko Winter Capital songchina dabianiara gitalgipa dabiani ong·ja, ian Meghalaya a·dokko man·dile on·anggipa pagitchamrangni Garo Hills-oba namroro silroroaniko niksamsoe songgigrikanisa ong·achim ine ASPF parakataha.

Tura-ko Winter Capital songgenchimode, Garo Hills-ni manderangnaba sorkarini kamrangko nambate dangdike on·asan ong·aigija, Garo Hills-o songdongenggipa manderang aro sorkarini gisepo nambate agangrikna cholrang ong·genchim, ineba ASPF parakataha.

“Da·o ong·atenggipa Budget Session-o Garo MLA-rangoni saksaba ku·rang on·jaenganiara namen dukni ong·a maina Tura-ko Winter Capital songchina dabienggipa Garo Hills-ni manderang, an·tangtangni seoke watatgipa dilgiparangkon iani bidingo bilake ku·rang on·china nangnikengachim. Garo MLA-rangni Tura-ko Winter Capital songani bidingo ku·rang on·janiara joltango namroro silroroaniko ra·bana gisiko nanggijaniko mesokani ong·enga,” ine ASPF-ni dilgiparang parakataha.

Garo Hills-ni namgnina kamko ka·ani aro ku·rang on·aniara seokako man·gipa dilgiparangni daito ong·a. Garo Hills-oba namroro silroroaniko ra·bana man·na gita pilak A·chik MLA-rangkon, iani bidingo bilake ku·rang on·pachina ASPF raken didiataha.