Tura, Sept 23, 2024: September 24 tarik Monggolbar salo chang 155-gipa Garo Hills Day-ko Tura-o manianggen ine Tura-ni MDC aro BJP-ni State Vice President Bernard N Marak parakataha.
Bernard Marak-ni parakatani gitade, ia apsan salon ANVC aro ANVC-B batanggipa 2014 bilsini September 24 tariko ma·mong sorkari baksa tom·tomanina songgigrikahani gimin Garo Hills Day-ko ANVC aro ANVC-B dolni sorkari baksa songgigrikani sal baksa apsan manigen.
“Ia Chang 155-gipa Garo Hills Day-ko September-ni 24 tariko Tura-o manigen aro apsan salon ANVC aro ANVC-B dolba, Meghalaya a·dokni Autonomous District Council (ADC)-rangko mangrakbatatna gita sorkari baksa songgigrike soi ka·grikahani gimin, A·chikrangni gimagimin Itihas-ko tangchaatpilani sal ong·enga” ine Tura-ni MDC parakataha.
Garo Hills Day-ni bidingo talate on·angengon, “1869 bilsini September 24 tariko Garo Hills Act-ko Governor General ra·chakaha aro ia niamni ning·o Garo Hills-ko Zamindari System-oniko ma·ekate, Garo-rangna jakgitelgipa District-ko songaha. Ia salon Garo-rang, British sorkarini somoio Zamindari System-oni jakgitel ong·aha” ine Marak parakataha.
Ia salara Garo-rangna namen dingtangmanchagipa sal ong·a, ine janapatengon, “Ia salko A·chikrang kusi ong·e manina nanga. GHADC-rangko mangrakbatatna songgigrikanio soi ka·giparangoni saksa ong·e aro Tura-ni MDC ong·e ia salko angni constituency-o manigen” ine Tura-ni MDC aro ANVC-B-ni gitcham Chairman Bernard N Marak parakataha.
