Tura, July 10, 2025:Tura Winger Transport Association-ni member-rang Monggolbar salo, Assam Goalpara-oni manderangko salbaenggipa gari driver aro gario re·baenggipa manderangko Chasinggre jolo dongdipate, neng·nikataniko on·ahani gimin, gario re·bagipa manderang, call ka·e, u·iataniko man·soe, Tura-o songdonggipa saksa Novembirth Marak Butbar salo chanchichipgipa, member-rangni kosako uamangni ong·gija dake neng·nikataniko on·anina, Araimile Pulis Station-o badi ka·doangaha.

Ua a·sel ong·aniko video ka·e social Mediao gipataniko niksoani ja·mano, permit gnang salenggipa grarirangko ong·gija dake champengatani a·sel gari nokgiparang, para salgipa gari driver-rang aro songregipa manderang ding·chaoani ong·kataha, ine janapatenba, “Video niksoani gitade, Tura town-o gari para salenggipa association-ni dilgipa, Tura-ko ga·bate Goalpara aro gipin a·jarangona manderangko gate salangna man·jawa, Tura-on passenger-rangko galone donangna nanggen, ine champengataniko dakenba, Tura-oni songregipa manderangko gate salangna man·jawa ine champengataha.

Uandake ong·gija niamko ra·gate, Winger para salgiparang aro songregipa manderangni kosako neng·nikaniko on·enga. Uni gimin mikkangchi indakgipa a·selrang ong·taijachina, gari para salgiparang aro songregiparang maming neng·nikatani gri tom·tome songrena man·china” ong·gija neng·nikataniko on·giparangni kosako sandianiko dake niam gita ja·ku de·angchina, Marak badi ka·e, uni seatgipa lekkao didiataha.

Unbaksana, Motor Vehicle Act-o pangchake, gari permit donggipa garirang para salna man·a, darangba champengna man·ja ineba Marak parakataha.

Indake, Tura-o gari para salgiparang ong·gija niamko ra·gate, para salgipa garirangko champengatani a·sel Garo Hills-ni dingtang dingtang biaprango Tura-oni re·angenggipa para garirangko dondikate, songregiparangna neng·nikataniko on·skaenga. Uni gimin, iani bidingo ta·raken sandianiko dakenba niam gita action ra·china Marak didiataha.