Tura, July 8, 2025: A·gilsak gimikni skanggipa dakgrikanio France a·songona re·ange sianggipa A·chik pagitchamrangko mande ra·e, chang 107-gipa Garo Labour Corps’ Day-ko bilsianti manirongbaenga gitan ia bilsioba July 16 tariko Tura Lower Babupara-o donggipa Cenotaph-o manina gita Sombar salo tom·e chanchirimaha.
Tom·anio West Garo Hills a·jani Deputy Commissioner Vibhor Agarwal, mongsonggipa ong·e dilangaha. Unbaksa Tura Municipal Board-ni Chief Executive Officer Jude Rangku T. Sangma, dingtang dingtang NGO-rang, Tura-ni Seniors’ Citizen-rang, Mothers’ Union, Garoland State Movement Committee, A·chik State Peoples’ Front, A·chik Conscious Holistically Integrated Krima, New Tura Development Committee aro gipin dilgiparang dongpae bak ra·angaha.
A·gilsak gimikni skanggipa dakgrikanio siangipa nokdangni manderangko, bilsi brigipa ma·gipa pagiparang, dingtang dingtang dolni dilgiparang, Civil Society Organisation-rangko okamate, Tura Babupara-o donggipa Cenotaph-o manina jinma tom·e chanchirimaha.
A·gilsak gimikni skangipa dakgrikanio A·chik pagitchamrang bang·en janggi tangtangko gimaataha. Uamangni ka·dongbee France a·songona re·ange, Matgrik ong·aniko gisik ra·na July 16 tariko jinma apsan krimkro manina miksongenga ine parakataha.
Uni gimin, A·chik a·songni manderang pilakan re·bae bakko ra·epachina DC mol·molataha.
