Tura, July 7, 2025: Garo Hills Autonomous District Council (GHADC)-o kam ka·enggiparang bilsi 3 ja 6 mang batpile dormaharangko man·jaengani gimin, changni chang Executive Committee-ko dilenggipa CEM, Deputy CEM aro Finance-ni EM-ko gronge mol·molahaoba, knachakteljaengani gimin, GHADC-o kam ka·enggiparang apsan ku·monge an·tangtangni neng·nikanirangko chakna amteljae, uamangni man·gni dormahako on·china dabie, July 7 tarikoni 11 tarikona sal bonga silent sit-in-demonstration ba asonge jingjengataniko dakna manchisogimin, gita da·al July 7 tarik Sombar saloni Tura Gandhi Park-o asonge jingjengataniko a·bachengataha.

GHADC-o kam ka·enggipa, Non Gazetted Employees Association (NGEA)-ni dilanichi uamangni man·na nangenggipa dormaharangko on·china dabie, kamtangtangko ka·gija duk ong·aniko mesokna jingjengataniko a·bachengataha.

“Chinga indakgipa ja·ku de·aniko dakna sikjaen, changni chang, chingni dilgiparangko chong·motan EM-rangko mol·molahachim. Indiba dilgiparang chingni neng·nikanirangko ma·sichakja. Uamang chingni gronge mol·mola changantian sengkubo tangka paisa man·joko on·gen inte, inte da·o ja 42 ong·pilaha. Indita sal somoina chinga chakchike, uamangni kattako ra·e kamrangko ka·aha. Sigipade siangjok dormaha man·gija, ian chingna aiao inmanbeani ong·a. Darang department-ba GHADC gita ja 42-na dormaha man·gijagipa dongkuja, ian skanggipa ong·enga. Jaantian district council-o kajinarang aro dingtang dingtang man·gnirang sokbaenga, indiba ua tangkarang bachi gimaenga ma·sinan man·pilja” ine NGEA-ni President Brithen Sangma kobor ra·timgiparangna aganaha.

“Chinga da·o skanggipa sal bongana asonge jingjengataniko dakengon, dilgiparangoni maidakgipa ka·dongataniko man·gen, ma·sikuja. Sal bongani gisepo chingna maming ka·dongataniko on·ja ong·ode, chinga sima ari dongija jingjengataniko dakangkuaigen. Chinga da·alo ja 42-ni dormaharang gimikko on·china bi·jaenga. Indiba chinga bilsi 1 mangmangnikosan bi·enga. Uni gisepon, chingna jagittam ba jabrirangni dormaharangko on·na ku·rachakako chinga ianpake ra·chakjawa. Bisong pangnan chingna ku·rachakaniko on·ronga, indiba kamde chu·sokrongja. Uni gimin chingna ia changode bilsisaniko on·na nanggen. Chingni bi·a gita bilsisani dormaharangko on·kuja dipetna chinga jingjengataniko dontongjawa. Iako chinga jinma apsan ku·monge tik ka·aha aro chingni tik ka·giminko dingtangatjawa” ineba Brithen Sangma aganaha.