Tura, June 23, 2025: West Garo Hills a·jani Rajabala Pulis Station-ni ning·o ga·akgipa Morasuti songo bilsi 32 ong·gipa Aminul Islam, apsan songo donggipa mande saksako chadrapani ja·man attam 5:15 bajirango songni manderang ka·onange Aminul Islam-ko jinma rike dokani a·sel ua biapon siaha.
Koborni gitade, Aminul Islam, gisikni gita bilgrigipa saksa Fulbahar Sheikh-ko attechi chadrapaha. Sheikh-ko chadrapani ja·man, Aminul Islam ua biaponi katna jotton ka·ahachim, indiba songni manderang uko jinma rikaha aro uni katna am·mitingo uko srape dokskaha.
Songni manderang jinma dokanichi Islam-ni skoo ning·tue mataha aro be·enni dingtang dingtang bakrango bilongen saknaako man·ahani a·sel, ua New Bhaitbar Durga Mandir-ni ning·o pulisrangni sokbana skangan siaha.
Pulisrang a·sel ong·gipa biapona sokangon, jinma tom·dakgipa manderang dongjaha ine West Garo Hills a·jani SP Abraham T Sangma aganaha. Ia mamlako Rajabala Pulis Station-o segataha aro Aminul Islam-ni manggisiko pulisni custody-o donengkua aro nanga gita ja·kurangko de·e, sandianirangko dakanggen ine SP aganaha.
