Dainadubi, June 5,2025: A·gilsak gimikon June 5 tariko, ‘World Environment Day’ (WED)-ko manitokengon, North Garo Hills a·jani Dainadubi joloba, nangrimgimin dingtang dingtang NGO-rang chong·motan Garo Students’ Union (GSU), A·chik Dedicated Integrity Leaders (ADIL), Niksamso Garo Community Organisation (NGCO), All A·chik Youth Federation (AAFY), DEO, Garoland State Movement Committee (GSMC), AGPF aro PJAC apsan melie, World Environment Day-ko maniangaha.
Bilsianti a·gilsak gimikni dingtang dingtang biaprango ‘World Environment Day’-ko maniani miksongara, a·gilsako bol wa·arang komiangengahani gimin, an·chingni samtangtango ong·telaigipa bakrangko name aro balance ong·e, ripingangna miksonge, June 5 tarikko ‘World Environment Day’ ine donaha. Indake ia salo tipangenggipa chiring chibisikrang, gimaangenggipa buring bolgrimrang aro bol wa·arangko name ripingangna, dingtangmancha ia salo manianiko dake, bol wa·arang gri bangbang ong·enggipa biaprango bolrangko ge·dapenga.
Uandake North Garo Hills a·jani Dainadubi jolrango songdongenggipa manderang, skul bi·sarang NGO-rangni dilachi Bristibar salo World Environment Day-ko manienba, bang·a bol chararangko dingtang dingtang biaprango ge·angtokaha.
