Selsella, May 31,2025:: West Garo Hills a·jani Selsella Damalgre-o 33 kV-oni 11 KV Control Room, Sub-Station-ko rika matchotahaoba ia sub-station-ko da·onaba chalaikujaengani gimin, Selsella jolni dingtang ding-tang dolrang jekai GSU, FKJGP, ADE, ASWA, NGCO, ANYO, GSMC aro ACHIK Council dolrangni nangrime bikotgipa, All Selsella NGOs Alliance (ASNA) parakatenba, ia sub-station-ko manderangni namgnina ta·raken, a·bachengatchina sorkariko didiataha.

“Selsella Distribution Sub-Division-ko 2019 bilsini February 21 tariko, a·dokni Skotong Minister Conrad K Sangma, Selsella-ni Multi Facility Centre-o kulie on·angaha. Indake Selsella jolrango bijoliko nambatatna gita ja·kurangko de·ahani gimin,jolni manderang sorkariko aro MePDCL department-ko mittelataha. Indiba Selsella Damalgre-o rikgipa 33 kV-oni 11 KV-ona control room sub-station-ko rika matchotahaoba, ia sub-station-ko chalaikujaengani gimin, ia sub-station-ko chalaina a·bachengatchina ASNA sokariko mol·molataha.

Selsella Damalgre-o rikgipa 33 kV-oni 11 KV-ona control room sub-station-ko chalaiahaode, ian Selsella jolrango bijoliko nambate jakkalna man·gnok ine parakatenba, chel·ao donggipa sub station-rango pangchakna nangani dongjawaha, joltangon bijoliko name chalaie, chu·onga gita voltage-ko nambate jakkalna man·gnok Da·ode ian sorkari office-rangna, skul aro college-rangna, health centre-rangna namgni ong·gnok ine ASNA parakataha.