Shillong, May 29, 2025: Re·anggipa May 24 tariko mande saksa an·tangni mikkangko ba·ra katipe, skulni me·chik bi·sa saksako skirt kikdoe, mobile phone-o photorangko ka·enba, social mediarango gipataha ine koborko man·soan baksana dingtang dingtang, social mediarango viral ong·gipa video-rangko niksoani ja·man, May 26 tariko East Khasi Hills a·jani Additional SP Ivan B.Diengdoh-ni dilachi Special Team-ko bikote, am·sandianiko dakenba dos dakgipa mandeko rim·na gita man·aha, ine parakataha.

Koborna parakatani gitade, ia a·sel, May 23 tariko Umsoshun-oni re·anggipa lane YWCA minggipa biapo ong·aha. Ia a·selni bidingo duko ga·akgipa me·chik bi·sani badi ka·ahani gimin, sandie nion, ia a·sel pring 6:30 bajimango ong·aha ine ma·sina man·aha aro Lumdiengiri Pulis Station-o ua mandeni kosako PS Case Number 55 (05) 2025 under section 76/79 BNS R/W Section 11/12 POCSO Act-o mamlako segataha.

Minggipin a·selara re·anggipa May 19 tarikni pring 7:15 ba 7:30 bajimango, Shillong Pulis Bajar sepango donggipa Dreamland Step-oba, skulni me·chik bi·sa saksako kragija kal·akna jotton ka·enba dokani gimin, badi ka·aha aro Sadhar Pulis Station-oba, uni kosako PS Case Number 140 (5) 2025 under section 7/8 POCSO Act-o mamlako segataha. Ia minggni case-rangara namen ning·tue sandina nangchongmotgipa ong·a aro iani bidingo namedake am·sandianiko dakenga, ine East Khasi Hills-ni SP Vivek Syiem parakataha.

Syiem-ni parakatani gitade, ia a·selni bidingo Special team am·sandianiko dakenba, salgittamni gisepon, dos dakgipa mande jean bilsi 24 ong·gipa Himan Gogoi-ko Assam, Jorhat-oniko rim·na gita man·aha.

Ia mamlani bidingo, Women Pulis Sub Inspector, Lavinia Kongwang-ni Team aro Assam Pulis May 28 tarik pringo, Jorhat-ona re·angaha aro Jorhat-ni Lahdoigarth Out Post-ni pulisrang baksa apsan bakrime am·sandianiko dakenba, dos dakgipa Himan Gogoi-ko Jorhat, Teok Pulis Station-ni ning·o donggipa Bamkukurachua songoniko uni maharini nokoniko rim·aha.

Pulisrang, dos dakgipa mandeni jakoniko uni namgija kamrangna jakkalgipa mobile phone-ko ra·sekaha aro gipin namgijagipa kamni sakkirangkoba man·aha. Ia mande, Teok Pulis Station-oba case dongachim, uni kosako Teok PS Case Number 43 (03)25 under section 329(3)/79 BNS Act-o segatgimin mamlako man·aha, ine Syiem parakataha.

Dos dakgipa mandeko skanggipa Jorhat, District Court-ona watatchenggen aro nanga gita sing·sandianiko dakani ja·mano, Shillong Court-ona ra·bagen ineba SP parakataha.