Williamnagar, April 23: East Garo Hills a·jani Mangsang jolo bijoli siliting nangdimani a·sel wa·al chadoe, Nokma saksani nokko wa·al kamaha. Ua wa·al kamaniko songni manderang ong·gija kattarangko agane jangbingbangataha. Uni gimin tol·e jangbingbanggiparangko pulisrang mikrakataha. Maina tol·e jangbingbangatachi basakobade kajia golmalko ong·ata.

East Garo Hills a·jani Rongjeng Pulis Station-ni ning·o donggipa Morongga Nengkram songni Ma Presila N Marak-ni nokko Monggolbar salni 12:21 bajimango wa·al kamaniko pulisrang kobor man·e, wa·al kamgipa biapona re·angaha.

“Chinga wa·al kamgipa biapona re·ange, wa·al kamani a·selko sandion, bijoli silitingrangko name tarijani a·sel nok te·sako wa·al kamaha. Wa·al kamani somoio nokni manderang darangba dongja. Ua nokko darangba mikbue wa·al so·ja, uan jangbingbangani kattasa ong·aia,” ine East Garo Hills a·jani Superintendent of Pulis (SP) S.A Rynjah parakataha.

Uni gimin ong·gija kattangko agane jangbingataniko dakjachina SP mikkrakataniko on·ataha, uni gisepon saobarang manigija tol·e jangbingbangatode, niam gita ja·ku de·anggen ineba SP parakataha.