Tura, April 22, 2025: A·dok sorkarini Meghalaya Public Service Commission (MPSC)-ni gital Chairperson-ko seokanio Garo-rangonilo watchanggale, Khasi aro Jaintia jatoniko seoktaiahani gimin A·chik State People’s Front (ASPF) dolba jegalate, namnikgijaniko parakatenba, iani bidingo nipiltaichina a·dokni Skotong Minister Conrad K Sangma-na sedoataha.

Iani bidingo A·chik Conscious Holistically Integrated Krima (ACHIK) dolba, jegalate, a·dokni Skotong Minister-na sedoatenba, MPSC-ni gital Chairperson-ko seokanio name nipiltaichina didiatahachim.

Apsandaken ASPF dolni Skotong Minister-na sedoatgipa chittio parakatani gitade, da·o kamoni watangenggipa MPSC-ni Chairperson-ba Khasi aro Jaintia jaroni ong·achim. Da·o uni palo gital Chairperson-na seokagipa mandeba Khasi aro Jaintia jatonin ong·taia.

Meghalaya State Reservation Policy (SRP) 1972 bilsio Khasi, Jaintia aro Garo-ko dolgni dake ra·enba, dolpraknan 40 percent-ko kange donmanaha aro iano pangchaken MPSC-ni Member-rangko, mongsongbate Chairmanship-koba dolgnini gisepo sualgrike seoke on·ani ong·achim. MPSC-ko 1972 bilsio a·bachengaonin Chairperson-ko Khasi aro Jaintia jatoni chang 9-na jako ra·aha, indiba Garo-rangde chang 7-san jako ra·kuenga. Ian Reservation Policy-o dongimin niamko pe·ani ong·a. Da·o changsatai MPSC-ni Chairperson-na Khasi aroJaintia jatoniko seokaniara, dolgnini gisepo bak rengsi sualgiminko pe·ani ong·enga, ine ASPF-ni General Secretary Adv Bernita R Marak parakataha.

MPSC-ni Chairperson-ko Khasi, Jaintia aro Garo jatgittamni gisepo sualgrike on·na nanga, ine badiaba official-rangni agananiko jegalenba, Reservation Policy-on Khasi aro Jaintia jatkode dolsan dake chanahani gimin indake seokaniara kraani ong·ja aro ra·chakna man·gijani ong·a ineba ASPF-ni General Secretary parakataha.

1972 bilsio dongimin, Reservation Policy-ko name ja·rikna gita 2022 bilsini April 5 tariko Meghalaya High Court, Roster System-ko ja·rikchina ge·etaniko on·manaha, ineba ASPF, gisik ra·atpiltaianiko on·ataha.

Uni gimin MPSC-ni gital Chairperson-ko Garo jatoniko seokskachina ASPF dabiangenba,dongimin Reservation Pollicy-ko ja·rikjagenchimode, A·chikrangna on·gimin bak rengsiko ra·seka gita ong·enga, ine a·dokni Skotong Minister-na sedoatgipa chittio ASPF parakataha.

ASPF-ni mol·molaniko knachakjagenchim ong·ode,, niamo pangchake jingjengatanirangko dakna draatako man·gen ineba Marak mikrakataniko on·atlaha.