Tura, April 18, 2025: Meghalaya Assembly-ni warakchakenggipa dolni dilgipa Dr. Mukul M. Sangma, Monggolbar salo PMGSY rama tarigimin aro tarikugijagipa, East Garo Hills a·jani Tebil Bonegre songoni Chinabat songona km 9.314 bakrogipa ramako name tariama tarijaenga, Simsanggre PWD Division-ni Executive Engineer (EE) Junior Engineer (JE) aro Contractor-rang baksa nieaha.
Je ramakon tariengachim, uarangko namdapate aro ta·rake matchotatchina didiangha. Jedakode songni nokni manderang re·a doanio neng·nika gri re·na man·gen. Manderangni salatantio re·ruraengipa ramarang namjaode aro taria matchotkujaode, neng·nikani ong·gen, ine Dr. aganaha.
“PMGSY ramarang World Bank-ni tangkachi tarigipa rama ong·a, uko nirok simsakani aro matchotgija tariengipa ramako nirokani angni daito ong·a” ineba Dr. aganaha.
Matchotgimin aro matchotgija tarigipa ramarangko, name tarijaenga aro sorokrang da·on tanggalengaha, maina uko roller-chi manedake jetjani gimin ta·raken nosto ong·enga aro sorokni km prakon, culvert ge·praksan tariengani gimin ia Tebil Bonegre-oni Chinabat songona tarigipa rama ru·uta bilsina baijawa, ine Dr. aganaha.
