Resubelpara, Mar 29, 2025: Ja·manchake koborko man·soani gide, batanggimin 2012 bilsio, North Garo Hills a·jani Resubelpara Higher Secondary Skul-o skigipa saksako so·ote galani bidingo pulisrang, Garo National Liberation Army (GNLA) gitcham bobil dolni area Commander saksako rim·aha ine u·iataha.
“Batanggipa 2012 bilsio Resubelpara Higher Secondary Skuni skigipa Denybirth G Momin-ko, nokdangni manderangni mikkango so·ote galahani gimin, GNLA Northern Zone-ni gitcham area Commander Laben Ch Sangma jekon Chenang ineba mingachim, uko rim·aha” ine pulis officer parakataha.
Pulus officer-ni parakatani gitade, ua obostani bidingo, 2012 bilsion Mendipathar Pulis Station-o badi ka·ahachim.
Badi ka·gipa lekkao janapani gitade, batanggipa 2012 bilsini July 19 tariko, GNLA bobil dolni area Commander Laben Sangma baksa gipin sakbonga manderang, Resu Mepan A·bri songona re·ange, bilsi 23 ong·gipa Denybirth Momin-ko pulisrangna kobor on·timgipa ine potchipenba, uni nok sambao goe galaha,” ine pulis officer parakataha.
Denybirth Momin-ko so·otgipa biaponiko AK guli bikrok, 9mm pistol gulini bikrok ge·gniko man·aha aro Denybirth-ko so·ota ine GNLA area Commander-ni a·kange soi ka·gipa chittikoba man·aha ine pulis officer parakaha.
Batanggipa 2012 bilsirango GNLA bobil dol, Garo Hills gimikon bilake kam ka·ani aro mande so·otanirang, mande rim·gittange ra·anirang, tangka dabie ra·anirang aro bang·a namgija kamrangko ka·e, Garo Hills-o so·sojengjeng ong·atachim. Indiba, 2018 bilsio, GNLA bobil dolni Commander-in-Chief Sohan D Shira-ko pulisrang so·otani ja·man, bobil dolni manderang gimikan an·tangtangko pulusna bame on·tokaha aro Garo Hills-o tom·tomaniko man·pilaha.
