Tura, Aug 26, 2024: Ma·mong sorkarini ra·gate on·gipa, Jal Jeevan Mission (JJM)-ni kamrangko Garo Hills-o manderangni nangnika gita kamrangko ka·e on·jaenga aro kamrang matchotjaenga ine Tura-ni Social Activist Jaynie Sangma-na dingtang dingtang songni manderang badi ka·doatahani gimin, Garo Hills-ni dingtang dingtang biaprangona re·ange songni manderangko grongenba sing·sandie nion, JJM-ni kamrang chu·sokna aro matchotna man·jaenga ine ma·sina man·aha.
Iani bidingo Jaynie Sangma department-ni official-rang aro contractor-rang baksa North Garo Hills a·jani Kharkutta constituency-o donggipa Rongbu songona August 23 tariko re·ange songni manderang baksa chanchirimaniko dakenba, contractor-rangko manderangni nangnika gita JJM-ni kamrangko matchotate ba chu·sokate on·china didiangaha.
Indake, August 24 tariko Resubelpara constituency-ni ning·o donggipa Raja A·pal Gindasipara songona department-ni manderang aro contractor-rang baksa re·ange, songni manderang baksa tom·e chanchirimanikoba dakangaha.
Tom·e chanchirimanio songni manderang JJM-ni kamko name aro tik ong·e ka·jani gimin, contractor-ni kosako matnange, Jaynie Sangma aro department-ni manderangna agan talate on·aha.
Songni manderang an·tangtangni neng·nikaniko agan talate on·ani ja·man, contractor-ni matchotgijagipa kamrangko manderangni nangnika gita chu·sokate on·china, Jaynie contractor-ko didiangaha. Je kamrangko contractor matchote ba chu·sokate on·na nangengachim, uarang gimikkon kam matchote on·na gita contractor ku·rachakaha.
JJM-ni kamrangko bilsignina skang a·bachengahaoba, da·alona kingkingba Raja A·pal jolni manderang JJM-ni chi tingtotsakoba ringe nikkuja ine songni manderang aganaha. Raja A·pal jolo JJM-ni chiko ringna man·ode, a·gilsak bikpilnaba donga ine songni manderang contractor-ko ka·onange agantokaha.
Uandake, JJM-ni kamrang chu·sokna man·jani gimin, tom·anio songni manderang social activist aro department-ni manderangni mikkango parake aganaha. Garo Hills-o JJM-ni kamrang chu·sokna man·jaengani gimin, songsalna dangdike on·enggipa Jaynie Sangma niroke songni manderangna kamrangko ka·e on·enga. Je biaprangon, JJM-ni kamrangko name ka·jaengachim, ua biaprangona re·ange contractor aro department-ni manderang baksa nirokaniko dakenga. Songni manderang maming neng·nikani gri namgipa chiko ringna man·na gita chi pipe-rangko sale on·china ma·mong sorkari JJM scheme-ko ra·gataha. Uni gimin songanti nokantion namgipa chiko ringna man·chongmotna nanga.
Je biaprangon chirongdikrangko tariahachim aro je chiringonikon chiko ra·baengachim, ua chiring chibisikrango bolrangko ge·china gitaba Jaynie Sangma songni manderangko didiangaha. Bolrang a·ako ka·sinate chiko tangata, je biaprangon bolrang dongja, chirang tipgen. Uni gimin, songni manderang bolrangko ripingna aro ge·dapna nanga. Garo Hills-o bolrang komiani a·sel chiring chibisikrang tipangengahani gimin tipangenggipa chiring chibisikrangko tange rakkina bolrangko ge·na nangchongmota.
“Mikkangchi an·chingni dedrang su·drangna chanchie, an·ching chiring chibisikrangko tange rakkina nangenga” ineba Jaynie Sangma aganangaha.
“Da·alo an·ching bolna ka·sagija den·e galode, an·chingni dedrang ja·mano chi tingtotsana mikkchi ga·akna nanggen. Uni gimin an·ching name chanchina nangchongmota. Garo Hills-o bol-wa·arang namen komiaha, uni a·sel da·alo an·ching ringani china neng·nikaniko man·enga. Da·alo climate-ni dingtanganiko an·ching nikna man·a, maini a·sel climate dingtangaha, environment namjani a·sel ong·enga. Bol-wa·arang dongjani a·sel ding·anirang batroroenga. An·chingara sallikkimna aro chijanggina bol-wa·arangko ge·dapna nangengaha” ineba Jaynie Sangma agandapangaha.
Ma·mong sorkari songanti nokantio namgipa chiko ringpachina gitasa JJM scheme-ko ra·gate on·aha, chiko skatang nangai nangjai jakkale rochina on·ja. Uni gimin JJM-ni niamrangko ja·rikchina aro chiko simsake jakkalchina Jaynie Sangma mikkrakataniko on·angjolaha.
