Tura, Feb 15, 2025: Garoland State Movement Committee (GSMC) CEC HQ-ni dilgiparang, February 14 tarik Sukrobar salo Captain Williamson Sangma State University (CWSSU)-ni gital Vice Chancellor (VC) aro Registrar Ambrose Ch. Marak-ko apsan salon Balalgre-o gronge Teaching aro Non Teaching Staff-rangko ra·napengon, A·chik A·song ma·ate, A·chikrangko kamo ra·nape, mikkangchi A·chikrangko namroro silroroatna man·gen, iani bidingo dilgiparangko Captain Williamson Sangma State University-ni dilgiparangko grongeaha.
Uamangko grongegiparangara GSMC CEC HQ, Tura-ni Acting Chairman Balkarin Ch. Marak, Assistant Organising Secretary Nikcheng Marak aro gipin dilgiparang dongpaaha.
GSMC HQ-ni Assistant Environment Secretary Silbath A.Sangma-ni u·iatani gitade, Captain Williamson Sangma State University-ni gital VC-ko grongeahaon, battangimin salrango A·chikrang bilsi 50-na namen ja·manchakbeaha. Mongsongbate a·doktangon ja·manchakahani gimin, chugipa gadango chong·motan Centre-ni gadango porikkarangko sesusaanirango maikai chu·sokgen ine galchipanina sintianiko janapangaha. A·chik a·song ma·ate, manderang gimikni palo ka·donganiko parakatenba, mikkangchi namgipa dakchakaniko A·chik A·songna on·na man·gen. Uni gimin A·chik A·songni tang·doaniko ma·sina sikgenchimode, u·iani gadangko on·china GSMC dilgiparang VC-ko didiangaha.
