Tura, Mar 29, 2025: Chang 13-gipa GHADC-ni Provisional Budget Session, Sukrobar salo matchotangaha.

Indake chang 13-gipa GHADC-ni Provisional Budget Session-o warachakenggipa dolni MDC-rang, Meghalaya a·dok gimikni gnigipa Skotong ba Sin·karini tom·bimonganiko Tura-o dakchina, chongmotan Winter ba Second Capital-ko songchina dabianian A·chik a·songo mongsonggipa ong·engani gimin, manderangni jakchi seokatako man·gipa sak 29 MDC-rang A·chik jat a·songni namgnina apsan ku·mongrime, a·dok sorkarina ku·rang on·pana miksonganio Winter Capital-na Resolution-ko ra·baha. Indiba ua Resolution-ko Budget Session-o GHADC-ko chalaienggipa EC-rang ra·chakjaha ine warachakenggipa dolni MDC-rang suk ong·gijaniko parakataha.

“Beben chinga MDC-rang Winter Capital-ko ra·bana man·gen, inede ong·ja, indiba apsan ku·monganiko on·pana ingipao miksongesa ia Resolution-ko ra·baachim. Indiba da·alo rasong gribeani ong·aha. Chinga manderangni seoke watatako man·gipa MDC-rang A·chik jatni nangnikanina ku·rang on·pana miksonge ra·bagipa Resolution-ko chanchirimna man·jahani gimin suk ong·jaha” ine opposition dolni dilgipa aro Kharkutta-ni MDC Cherak W.Momin aganaha.

“Ia district council-de ong·jaengaha, manderangni seokatako man·gipa MDC-rang manderangni palo ku·rang on·na man·janiara, A·chik jatni nangnikaniko jegalani ong·a. Ian saniba ge·etanichi jatni nangnikaniko jegalani ong·a. Ia district council A·chik jatni GHADC ong·jaha, party-ni gita ba saniba namgnina chalaienggipa district council-sa ong·skaengjok. Winter Capital-ni gimin chanchirimna ra·bagipa Resolution-ko ra·chakjahani gimin, anga Session-oni ong·kate re·baha” ine Tura-ni MDC aro BJP-ni State Vice President Bernard N.Marak aganaha.

Indake ong·engon, GHADC-ni CEM Albinush R.Marak-ni aganani gitade, ia Provisional Budget Session-o dingtang dingtang Motion-rang aro Resolution-rangko ra·bae, chanchirimaniko dakaha. “Anga Delimitation-ni gimin Official Motion-ko ra·baha aro ia motion-ko ruling aro opposition dolgnian namnike ra·chakaha. Da·o chinga Delimitation Committee-ko songe, kamrangko a·bachengatgen” ine Marak aganaha.

Opposition MDC-rangni ra·bagipa Resolution-ko ra·chakjaha ine matnanganina aganchakatskaengon, “Beben chinga Winter Capital-ko nangja ine jegala ong·ja, Winter Capital-ko A·chik a·songni manderangan nangnikchongmotenga aro chingaba namnikpaa. Indiba re·anggipa Assembly Session-on, ia Winter Capital-ni bidingo chanchirimaniko dakenba, a·dok sorkari Committee ge·sako songaha. Ua Committee Winter Capital-ni gimin sandie kam ka·gen, uni giminsa chinga a·dok sorkarini songgipa Committee-ni kam ka·aniko nichakengkua. Chinga A·chik ong·pae, Winter Capital-ko nangnikja aro ra·chakna man·jawa inede ong·ja. Chingaba A·chik a·song aro jatni namroro silroroanina nikna sika aro apsan ku·mongen kamrangko ka·enga. Ia Winter Capital-ko dabianiara A·chik jatni namgninan ong·a ine chingaba ma·sia” ine GHADC-ni CEM aganaha.