Tura, July 14, 2025: Tura-ko Winter Capital songchina dabie, ASPF aro GSMC Sonibar salo North Garo Hills a·jani Karkutta-o tom·bimonganiko ong·atangaha.
Ua tom·bimonganio Nokma-rang, Garoland State Movement Committee Resu Unit-ni dilgiparang, ge 36 songrangni Lasker-rang unikoa Kharkutta jolni manderang sokbae bak ra·angtokaha.
Tom·anio ASPF HQ-ni General Secretary Bernita R. Marak mongsonggipa sokgipa ong·e, jinmana talatangengon, indake aganaha, ‘Meghalaya a·dokara Assam a·doko ongengmiting somoio Assamese ku·sikko official language dake ra·gatani gimin, ra·chakna man·jae, dingtang a·dokna dabie, 1970 bilsio Meghalaya autonomous a·dokko manaha. Unni ja·mano Meghalaya a·dokko silroro namroroatna chanchie sak 41 MLA-rang Garo Hills-koba ga·changbatgija GHADC-o skangipa changna Assembly Session-ko a·bachengdilaha.
Unon adita sak Khasi MLA-rang Sinkari-ni Session-ko Tura-o ong·atna nangnikaha. Maina sinkario Shillong-ode agre sin·dugaa. Indake ua salrangonin miksongani donggenchimoba, chu·sokgipa ong·na man·jaha. Indiba da·alo A·chik a·songo dongenggipa manderangni ku·monganichi, nangarangko chu·sokatna pangkamgipa Winter Capital-ko chu·sokatna “Hai Apsan Bilake Ja·ku ga·na” ine Marak sakantikon mol·molangaha.
Meghalaya a·doko ge 48 sorkari department-rang donga. Mikkangchi Winter Capital-na agan-ku·pattianiko on·e aro chanchianiko ra·ode, A·chik sakantian an·tangtangni miksongako Winter Capital-ko namnikpaa ine bimingrangko see on·tokna hai apsan ja·ku de·na ine ASPF dilgipa ku·mongangaha.
“Angade chonnikako namnikja, unan angaba da·alo ong·kataha. Hai A·chik a·song gimikan apsan ku·rang on·na, ku·rang on·jaode, sawa knagen” ineba Marak aganangaha.
GSMC HQ-ni Acting Chairman Balkarin Ch. Marak, “Winter Capital-na dabianiara A·chik a·songni nanganirang bang·en gnang, ia neng·nikanirangko chu·sokataniara Winter Capital ong·a. A·chik a·songna nangchongmotenggipa Winter Capital-ko dabie chu·sokatna an·chingni chasongon nanga. A·chik chadamberang gisik wa·sagipa mikkangchini gimin chanchigipa ong·a, an·ching knalna miksonganiara dedrang su·drangona namgniko on·ani ong·a. Uni gimin hai Kharkutta jolni A·chik a·songni manderang sakantian nangnikaniko chu·sokatna apsan jak on·pae ku·mongrima”‘ ine Balkarin Marak mol·mollangaha.
Indake ong·engon, Winter Capital-na dabianio, Kharkutta jolni saksa Johnsh K. Marak-ba, “‘Angni A·chik a·songna mikkangchi silroro namroroaniko ra·bana jotton ka·na sika. Winter Capital-ko da·alo dabianiara gisik gnangipa pagitchamrang atchitaiaha ine bebe ra·a. Uni gimin mikrakaniko on·na ia manderang A·chik a·song gimikona re·roroe da·alo Kharkutta-ona sokbajok. Salsaode an·ching mikkangchiko niate Winter Capital-ko man·ningjaode, separate ong·na draatako man·gen”‘ ine jinmana tallatangaha.
GSU Kharkutta Regional Unit-ni President Jenggil K. Sangma-ba, “Ku·cholsan ong·ode, an·ching A·chikrang ta·raken ja·ku ga·anio chu·sokgenchim. Anga ku·mongna sika, hai an·ching Kharkutta jolo songdonggipa sakantin bakko ra·e Winter Capital-na ku·mongna*.
Uandake, Piklu Sangma-ba, “‘Mikkangchi hai an·ching Winter Capital-na ku·mongna, Kharkutta-o dongdongengipa manderangko jinmani palo mol·molna sika” ine jinmako ku·mongangaha.
Resubelpara Khaldang-ni Ma Junmoni B. Marak-ba tom·anio dongpae, “Skangipa changna angaba Winter Capital-na tom·bimonganio bakko ra·na manpae namen katchabea aro bang·a agan-kupatianiko man·pajok. Mikkangchiba ku·mongna hai A·chik a·songna ku·monganiko on·angkuna sika”.
Unbaksana Kharkutta Anti Secretary Tas Sangma-ba, “Mikkangchi apsan jak on·na ia Winter Capital sokbaode, mikkangchi bang·a namgniko man·gen, uni gimin, department-ni Director-rang gimikan sokbagen, angade unan support ka·na re·bajok” ine jinmana aganangskaha.
