Williamnagar, Feb 25,2025: Re·anggipa January jao Garo Hills Autonomous District Council (GHADC)-ni Chief Executive Member (CEM) Albinush R.Marak-ni Social Activist saksako ka·mikkenataha ine matnangenba, Social Activist saksa CEM-ni kosako badi ka·ahachim, indiba Williamnagar Pulis Station-ni Officer-In-Charge (OC), maming ja·kurangko de·jahani gimin, ua pulis officer-ni kosakoba, East Garo Hills a·jani Social Activist, Nilbath Ch Marak, Meghalaya a·dokni Director General of Pulis (DGP)-na badi ka·doangaha.
GHADC-ni CEM, Social Activist Nilbath Marak-ko ka·mikkenatahani gimin, re·anggipa January 23 tariko Social Activist, Williamnagar Pulis Station-ni OC-na badi ka·ahachim. Indiba iani bidingo Williamnagar pulis station-ni OC, CEM-ni kosako maming ja·kuko de·kuja, ine Nilbath Marak, DGP-na badi ka·doangskaaha.
GHADC-ni Siju constituency-na chamatgipa bang·a project-ni tangkarangko jakkalsreta ine CEM aro gipin official-rangni kosako Nilbath Marak aro Flaming Marak, Meghalaya Lokayukta-na badi ka·doangani ja·man, ua obostani bidingo inquiry-ko dakchina Meghalaya Lokayukta ge·etaniko on·ahachim.
Uandake ong·engon, ua case ba mamlako ra·pilchina GHADC-ni CEM, February 22 tariko Social Activist-na phone ka·e uko ka·mikkenataha ine Nilbath Marak, pulisna badi ka·doangaha. Indiba Williamnagar Pulis Station-ni OC, CEM-ni kosako maming ja·kurangko de·kujaenga ine matnangenba, niamo pangchake ja·kurangko de·na nangachim, indiba CEM-ni kosako maming ja·kurangko de·gija donchipaaniara bilo ong·enggipa manderangnade, ia niamara ong·ja ine mesokani ong·a ine Social Activist, DGP-na sedoatgipa chittio janapataha.
GHADC-ni CEM aro Williamnagar Pulis Station-ni OC-ni kosako rakgipa ja·kurangko de·china Nilbath Marak, DGP-ko didiataha.
