Williamnagar, June 26,2025:: East Garo Hills a·jani Williamnagar jolo, nok rikani dingtang dingtang bosturangko cha·ugipa adita sak manderangko pulisrang rim·na man·aha, ine
East Garo Hills a·jani Superintendent of Pulis (SP) SA Rynjah-ni u·iataha.

SP-ni u·iatani gitade, re·anggipa June-ni 11 tarik walo, Williamnagar-ni nok te·sao dongipa nok rikani bosturangko cha·uaha ine Williamnagar pulis station-o badi ka·ani ja·mano pulisrang, cha·ugipa manderangko rim·na am·sandianiko dakenba, bostu cha·uanio jak dongna nanga ine chanchipgipa sakbri manderangko, June-ni 23 tariko rim·aha.

Ua sakbri manderangko rim·ani ja·man pulisrang sing·sandianiko dakon, uamangni cha·ugimin bosturangkoba pulisrang man·pilaha.

Rim·a man·gipa manderangara, Williamnagar Dawa Nengkatokgre songni bilsi 38 ong·gipa Bikan D Sangma, bilsi 23 ong·gipa Akelgre songni Jetlow R Marak, bilsi 25 ong·gipa Dawa Nengkatokgre-oni Sengba N Marak aro bilsi 30 ong·gipa West Khasi Hills a·jani Shallang jolo donggipa Rangram Pattal-oni Pebiriush G Marak ong·achim.

Pulisrang ua manderangoniko 16 mm Iron rod, 12 mm Iron Rod, 10 mm Iron rod, 8 mm Iron rod, CP Plus CCTV Camera, Grinder Machine, LED Monitor, Ceiling Fan aro ML-13A-6609 Bolero Pik-up gari bolsako man·aha, ine pulisrang parakataha.