Williamnagar, Apr 2, 2025: Williamnagar-ni bilsi 22 ong·gipa chadame Weghara R.Marak sagini manggisiko bilsignini ja·mano bilpilna, Meghalaya High Court-ni ge·etaniko man·e, April 2 tarik Butbar salo uni manggisiko bilpilaha. Sianggimin Weghara Marak-ni manggisiko bilpilanio, Executive Magistrate JR Marak, Williamnagar Crime Branch-ni DSP Subir Sangma, Rongjeng Pulis Station–ni Circle Inspector Selvis A Sangma aro Weghara R Marak sagini ma·drang maharirang dongpaaha.
Weghara Marak sagini manggisiko bilpiltaiani ja·mano, Tura Civil Hospital-ni Forensic Medicine Expert Dr AR Marak-ni jakchi post mortem ka·na gita ge·etaniko on·angaha.
Salseng M Sangma-ni depante Weghara R Marak, batanggipa 2023 bilsini February 25 tariko, Williamnagar-oni km 12-mang chel·ao donggipa Dorengkigre songni feet 120 mangna bate chugipa Jadi Dare kosakoni ga·akone siahachim.
Ua a·selni bidingo sianggipa chadambeni pagipa Salseng M Sangma, ua a·sel ong·aniko krae nikjaenba, indita chua biaponi ga·akgenchimode, maikai jakrani natengo matani chin aro sko janggilo ning·tue buani chinna agre be·enni gipin bakrangde maming mata buani gri name ga·akaha. Ua chubegipa dareoni ga·akongenchimode ,be·en gimikan binekna kraachim, ian bebe ra·na amsokgijani ong·a ine aganaha.
Ua dareni chua gadang gadang daka,indita chua biaponi ga·aka ja·man, uni gangipa chola, longpen, juta sosija aro maikai gori nosto ong·ja ineba Sangma sing·doangaha.
“Anga gisiko dukko chaka amjae, angni depanteni siani bidingo kakket bichako on·china Williamnagar Pulis Station-o badi ka·ahachim. Indiba, pulisrangni maming action ra·jani gimin aro uamangn am·sandie man·aniko chu·ongnikjae, ja·mano anga angni depante dongjahaoba kakket bichalko man·na nangchongmota ine chanchienba,High Court-o mokordoma ka·skaaha aro indake kacharini ge·etaniko man·e, angni depanteni manggisiko bilsigni batangahaoba, post mortem ka·piltaina April 2 tarik Butbar salo bilpilna ga·akaha” ine Salseng Sangma aganaha.
Da·o mai ong·gen Forensic Expert-ni post mortem report-na sengkuengani gimin ia a·selni bidingo kakketko aganna man·kuja ineba ua aganaha.
