Williamnagar, June 29, 2025: East Garo Hills-ni skotong song Williamnagar bajarni napram cholguga-o be·en, na·tok aro do·orangko den·e palenggipa biapo sera bera mitchi mitchi soa-simarangko skatang galanirangko, Williamnagar Municipal Board, nirokatna nanga ine didiatenba, ua biapko ta·rake nirokatja ong·ode, East Garo Hills a·jani Deputy Commissioner-na badi ka·doanggen, ine Social Activist Mingran T. Sangma parakataha.

Mingran Sangma-ni u·iatani gide, Williamnagar bajarni napram cholgugao be·en, na·tok aro do·o den·e palgipatang skatang jabol galram biap dake jakkalani a·sel, soa seenggipa bibarang mandena namen namgijaniko ra·baenga ine janapatenba, ua biapko Municipal Board-ni authority-rang, ta·rake nirokatchina Sangma didiataha.

Ua biap gitan manderang dondikgija re·ruraenga aro ua biaponi metre 100 mang sepangon, govt. LP skulba donga ine parakatenba, Skul bi·sarangni aro manderangni an·seng baljokanina namen chaktogija, seenggipa bibarang neng·nikaniko on·enga. Uni gimin District Administration-ba uarangko nirokatna nangchongmota ine Social Activist parakataha.