Tura, July 12, 2025: Warachakenggipa dolni dilgipa Dr. Mukul Sangma Tura-o rikenggipa, Pine Mount International Skulko Bristibar salo re·ange nirokeaha. Da·onaba ua skulko rika matchotkujani gimin, Dr. Sangma, a·dok sorkarini kamna suk ong·gijaniko parakataha.
Ua skulko batanggipa 2017 bilsini February jao tangkarangko chamate rikna a·bachengatgipa Tura Pine Mount International Skulko rika matchotama matchotkuja uko nina re·angon, 98% mangni gita matchotaha aro ua skulo dingtang dingtang kal·chakram biaprang jedake football field, basketball aro volleyball court-rangko rikna gitaba tik ka·ahachim, indiba uarangko rikjaha ine nikenba, Dr Sangma a·dok sorkariko matnangataha.
Unbaksana campus-ko ita-chi bera kadulgiparangba ondikaha ine nikaha.
Ia International skulko ge·sa branding dakna Doldegre aro Jowai-o rikna abachengaha, indiba ja·mano gimik a·jarangon ge·prak, Pine Mount International Skulrangko rikna miksongani dongachim. Ia Pine Mount International Skulara gipin Skulrangoni ge·sa nambatsranggipa Skul ong·a ine pilakan ma·sitoka. Uni gimin pilakan ia Skulo poraina sikgipa bi·sarang bang·en donga. Indiba tangka paisani gita cholgrigipa nokdangrang poraiatpana sikoba ia Skulo man·tokpaja.
“Angni Skotong Minister ong·ani somoiosa, anga pilak niamrangko poraie ma·siaha aro Pine Mount International Skulara kangal cholgrigipa nokdangni bi·sarangna ong·achim. Indiba dal·dalgipa manderangni dedrangsa ia Skulo poraiatokaha. Uni giminsa angni Skotong Minister ong·mitingo kangal cholgrigipa nokdangni bi·sarangna ia Pine Mount International Skulko rikna gita 2017 bilsini February jao tangkarangko chamenba, rikna a·bachengataha aro uamangna dingtangmancha poraina cholko on·na tik ka·aha. Indiba ia 2025 bilsionaba, ia skulko rika matchotkuja. Anga ia skulko nina re·baon, rika matchotningjani gimin, name rika cho·aniko nirokenba ta·rake matchoatchina sorkariko didiangen” ine Dr. Sangma kobor ra·timgiparangna aganaha.
Ua skulko nina re·angani somoio Tura-ni Senior Citizens Forum-ni dilgiparangba dongpae, Pine Mount International Skulko rikenggipa building aro kal·chakram biaprangko namedake tarichina didiangan baksa, changgipino re·bae nikroktaigen aro kam ka·anirangko name nikjaode, complain ka·gen ine aganangskaha.
Jensalo ia Skulko rika matchotgen, skigiparangko rakkion, uamangko tangitik gipin biapona ra·jitangna man·jawa, maina umangko kamo rakkina gita dingtangmancha Committee-ko songgen, uamangsa interview ra·e skigiparangko rakkigen, ine Dr Mukul Sangma aganaha.
Da·o rikgengipa, Pine Mount International Skul sepango Tura Government Medical College-ko rikenga. Unbaksana Farmers Market-koba sepangon rikenga, uarang gimiknan, “Angni Skotong Minister ong·mitiongo name chanchiesa tangkarangko chamate, Tura Medical College sepango Pine Mount International Skul aro Farmers Market-ko rikenga, jedakode Tura Medical College-o Doctor-rang ia biapo dongkame, uamangni bi·sarangko ia Pine Mount International Skulo poraiatna man·gen aro bajar anti cha·anio uamangna altubatgen” ine Dr. Sangma agandapangaha.
